მოლდოვის არჩეულ პრეზიდენტს დნესტრისპირეთში რუსი სამხედროების ეუთო-ს დამკვირვებლებით ჩანაცვლება სურს. ამის შესახებ მაია სანდუმ დღეს გამართულ პრესკონფერენციაზე განაცხადა.
„ჩემი პოზიციაა, რომ ეს სამხედროები უნდა გავიდნენ და იარაღი გაიტანონ მოლდოვის ტერიტორიიდან“, – განაცხადა მოლდოვის არჩეულმა პრეზიდენტმა.
მისივე განმარტებით, ქვეყნის ტერიტორიაზე სამხედრო მოქმედებების განახლების რისკი არ არსებობს, ამიტომ რუს სამხედროები ეუთო-ს წარმომადგენლებმა უნდა ჩაანაცვლონ.
„სამშვიდობოებთან დაკავშირებით არსებობს 1992 წლის შეთანხმება. ჩვენ მივიჩნევთ, რომ ახლა ჩვენს ტერიტორიაზე სამხედრო მოქმედებების განახლების რისკი არ არსებობს. ჩვენ მიგვაჩნია, რომ ეს მისია სამოქალაქო დამკვირვებლების მისიად უნდა გადაკეთდეს, რომელიც ეუთო-ს ეგიდით უნდა მუშაობდეს. ეს სიახლე არ გახლავთ. ამ პოზიციის წინ წაწევას მოლდოვა მრავალი წელია ახდენს“, – განაცხადა მოლდოვის არჩეულმა პრეზიდენტმა.
