მოლაპარაკების რესურსი არსებობს, ჩვენ დარწმუნებული ვართ, რომ მზაობის შემთხვევაში „ქართული ოცნების“ მხრიდან, ჩვენ შეგვიძლია, ძალიან სწრაფად მივაღწიოთ იმ შეთანხმებას, რომელიც აუცილებელია პოლიტიკური კრიზისის განმუხტვისთვის, – განაცხადა „ლელოს“ ერთ-ერთმა ლიდერმა, ბადრი ჯაფარიძემ კრისტიან დანიელსონთან შეხვედრის დაწყებამდე.

მისი განცხადებით, აუცილებელია გაბედული ნაბიჯები.

„უნდა გვესმოდეს, რომ ისეთი მძიმე პოლიტიკური კრიზისის განმუხტვისთვის, როგორშიც ახლა ჩვენ ვიმყოფებით, აუცილებელია გაბედული ნაბიჯები, მათ შორის „ქართული ოცნების“ მხრიდან. რაც შეეხება „ლელო საქართველოსთვის“, ჩვენ მზად ვართ და ვიყავით ყოველთვის კომპრომისისთვის, რომელიც იქნება ჩვენი თანამოქალაქეების ინტერესებში და ცხადია, რომ ჩვენ ძალიან დიდი იმედი გვაქვს, რომ ასეთი მაღალი დონის ჩართულობა მოლაპარაკების პროცესში, აუცილებლად მოიტანს დადებით შედეგს. მოლაპარაკებისთვის წითელი ხაზების დაწესება კონტრპროდუქტიულია. შესაბამისად, ჩვენ უნდა მივიღოთ ისეთ გადაწყვეტილებები და ისეთ შეთანხმებას მივაღწიოთ, რომელიც იქნება ჩვენი ქვეყნის გრძელვადიან ინტერესებში, რომელიც იქნება ჩვენი თანამოქალაქეების ინტერესებში და განმუხტავს მძიმე პოლიტიკურ კრიზისს“, – განაცხადა ბადრი ჯაფარიძემ.

კრისტიან დანიელსონი საქართველოში პოლიტიკური დიალოგის მედიაციისთვის თბილისს 12 მარტს ეწვია.