მონღოლეთის ერთ-ერთ პროვინციაში ბუბონური შავი ჭირის 2 შემთხვევა დაფიქსირდა. ამის შესახებ The sun- ი წერს.
ძმებს შავი ჭირი მას შემდეგ დაუდასტურდათ, რაც ზაზუნას ხორცი ჭამეს. მათთან კონტაქტში მყოფი 146 ადამიანის გამოკვლევა მაშინვე მოხდა.
თუმცა, გამოცემის ცნობით, არსებობს კიდევ 500 ადამიანი, რომლებთანაც ძმებს კონტაქტი ჰქონდათ.
WHO-ს ინფორმაციით, ბაქტერიულ ინფექცია, თუ მისი მკურნალობა დროულად არ მოხდა, ადამიანებს 24 საათში კლავს.
ერთი ძმა 27-ის, მეორე კი 17 წლისაა. ისინი ხოვდის პროვინციის ერთ-ერთ საავადმყოფოში არიან მოთავსებულები. უფროსი ძმის მდგომარეობა კრიტიკულია.
შავი ჭირი, იგივე შავი სიკვდილი, კაცობრიობის ისტორიაში ცნობილი ერთ-ერთი ყველაზე მომაკვდინებელი ეპიდემიაა, რომელსაც შუა საუკუნეებში ევროპის მოსახლეობის ნახევარზე მეტი ემსხვერპლა – დაახლოებით 50 მილიონი ადამიანი. მისი გამომწვევია ბაქტერია Yersinia pestis, რომელიც რწყილების ან დაინფიცირებული ცხოველების ნაკბენით გადაეცემა ადამიანს.
შავი ჭირი სამ სხვადასხვა ფორმაში შეიძლება გამოვლინდეს, მათ შორის ყველაზე გავრცელებულია ბუბონური, ყველაზე საშიში კი პულმონალური – ამ დროს ყველაზე დიდი შანსია, რომ ინფექცირებულმა ადამიანმა ხველებით სხვებიც მარტივად დააავადოს.
