აშშ ბელარუსის ხელისუფლებას ძალის გამოყენებისგან თავის შეკავებისკენ მოუწოდებს. ოფიციალური განცხადება თეთრ სახლში ცოტა ხნის წინ გაკეთდა.
ბელარუსში მიმდინარე მოვლენებზე შეერთებული შტატების ოფიციალური პოზიცია თეთრი სახლის პრესსპიკერმა, კაილი მაკკინენმა გააჟღერა.
„ღრმად ვართ შეშფოთებულები ბელარუსის საპრეზიდენტო არჩევნების გამო. მათ შორის კანდიდატებისთვის არჩევნებში მონაწილეობის შეზღუდვა, ადგილობრივი დამოუკიდებელი დამკვირვებლებისთვის საარჩევნო უბნებზე ყოფნის აკრძალვა. ოპოზიციონერი კანდიდატების დაშინება და მშვიდობიანი დემონსტრანტებისა და ჟურნალისტების დაკავებამ ჩრდილი მიაყენა პროცესს. ჩვენ მოვუწოდებთ ბელარუსის ხელისუფლებას, პატივი სცეს მშვიდობიანი შეკრების უფლებას და თავი შეიკავოს ძალის გამოყენებისგან“, – განაცხადა კაილი მაკკინენმა.
ბელარუსში საპროტესტო აქციები უკვე მეორე დღეა იმართება. მომიტინგეები საპრეზიდენტო არჩევნების შედეგებს აპროტესტებენ, რომლის მიხედვითაც არჩევნებში ალექსანდრ ლუკაშენკო ლიდერობს.
პოლიციასა და აქციის წევრებს მომხდარი შეტაკებების შედეგად, აქციების შედეგად პოლიციამ 3000 მომიტინგე დააკავა. დაშავებულთა რიცხვი 100-ს აღწევს, ერთი ადამიანი კი გარდაიცვალა.
