7 დეკემბრიდან, გურჯაანის მუნიციპალიტეტის ყველა სკოლა ონლაინ სწავლების რეჟიმზე გადადის. გადაწყვეტილების მიზეზი, სკოლის მოსწავლეების მშობლების ერთობლივი განცხადებები გახდა. გურჯაანის საგანმანათლებლო რესურს-ცენტრის ხელმძღვანელის, დალი მინდიაშვილის ინფორმაციით, კორონავირუსი ყველა სკოლაში არ დაფიქსირებულა.
„ვირუსი დაფიქსირდა ზოგიერთ სკოლაში და სპეციალისტების რეკომენდაციით, ის სკოლები გადაგვყავდა დისტანციურ რეჟიმზე. ზოგადი ეპიდემილოგიური ვითარების გართულების გამო, შემოსვლა დაიწყო მოსწავლეების მშობლების ერთობლივმა განცხადებებმა. მშობლის სურვილს წინ ვერ აღვუდგებით. ვცადე დამერწმუნებინა, რომ უსაფრთხოების ზომები დაცული გვაქვს, მაგრამ მაინც ასე გადაწყვიტეს“- განაცხადა მინდიაშვილმა.
გურჯაანის მუნიციპალიტეტში, სულ 25 საჯარო სკოლაა. 28 ნოემბრიდან,მთელი ქვეყნის მასშტაბით დაწესებული შეზღუდვები, კახეთში, მხოლოდ ქალაქ თელავს შეეხო. რეგიონის სხვადასხვა მუნიციპალიტეტების იმ სკოლებში, სადაც კორონავირუსი არ დაფიქსირებულა, სწავლება საკლასო ოთახში მიმდინარეობს.
ავტორი: ხათუნა გულიაშვილი
