“ბოლო დღეებში 60 წლის ქალის გაუპატიურების ფაქტზე გავრცელებული ინფორმაციის შემდეგ ერთ-ერთი ტელევიზიის მიერ ყველა სტანდარტის დაუცველად ძალადობის მსხვერპლის ინტერვიუს გაშუქება სხვა არაფერია თუ არა სამარცხვინო მოვლენა”,- ამის შესახებ “ქართული ოცნების” დეპუტატი ნინო წილოსანი სოციალურ ქსელში წერს.
“ვინმე თუ ამიხსნის რა მიზანს ატარებს მსხვერპლისთვის ჟურნალისტის მიერ გაუპატიურების თემაზე სიუჟეტში დასმული დეტალური კითხვები, რა საზოგადოებრივ ინტერეს ემსახურება მსგავსი ფორმით ფაქტის გაშუქება, სადაც დაზარალებული პირის იდენტიფიცირება პირდაპირ ხდება სახის დაფარვის გარეშე და მისი პირდაპირი დაკითხვის რეჟიმში ინტერვიუს ჩაწერა უმსგავსო კითხებზე პასუხების მოთხოვნით?!
შეგნებულად არ ვაზიარებ ვიდეოს, რათა ტირაჟირება და გავრცელება არ მოვახდინო იმ სამარცხვინო სტანდარტის, რასაც დღეს ერთ-ერთი ტელევიზია საზოგადოებას სთავაზობს (იმედია, თავად მედიასაშუალება ამოიცნობს საკუთარ თავს )
კიდევ ერთხელ ხაზგასმით მინდა ავღნიშნო, რომ ძალადობის, განსაკუთრებით კი ქალთა მიმართ სექსუალური ძალადობის ფაქტები, განსაკუთრებული სენსიტიურობით გამოირჩევა, სადაც ხშირად ხდება, სამწუხაროდ საზოგადოების მხრიდან მსხვერპლის დადანაშაულება, და თავად დანაშაულის რომანტიზება !!! სწორედ ამიტომ ამგვარი ფაქტების გაშუქებისას მედიის როლი განსაკუთრებით მნიშვნელოვანია, შესაბამისი სტანდარტის დაცვით ვიცავთ პოტენციურ მსხვერპლსაც!”,- წერს წილოსანი.
