თვითაღიარებული მთიანი ყარაბაღის დე-ფაქტო ხელისუფლება აცხადებს, რომ გასული ღამის განმავლობაში აზერბაიჯანის შეიარაღებული ძალები დასახლებული პუნქტების მისამართით იერიშს განაგრძობდნენ. ინფორმაციას სომხური მედია ავრცელებს.

გამოცემის ცნობით,  საარტილერიო ცეცხლი გახსნეს მარტუნისა და ასკერანის რაიონების სოფლების მიმართულებით. სომხური მხარის განცხადებით, დარტყმები განხორციელდა დასახლებულ პუნქტებზე, ასევე ახლომდებარე სასოფლო სამეურნეო დანიშნულების ობიექტებზე.

აზერბაიჯანის თავდაცვის სამინისტროს განცხადებით, ფრონტის სხვადასხვა მიმართულებაზე საბრძოლო მოქმედებები ღამის განმავლობაში სხვადასხვა ინტენსივობით გრძელდებოდა.

აზერბაიჯანის თავდაცის უწყების ცნობით, მოწინააღმდეგე მხარემ აზერბაიჯანული არმიის პოზიციებს ცეცხლი გაუხსნა. ოფიციალური ბაქოს განცხადებით, აზერბაიჯანის ძალებმა კონტროლს დაქვემდებარებული ტერიტორიები გააფართოვეს. აზერბაიჯანში აცხადებენ, რომ განადგურებულია მოწინააღმდეგის ცოცხალი ძალის და ტექნიკის დიდი რაოდენობა.

შეგახსენებთ, რომ სომხეთსა და აზერბაიჯანს შორის ურთიერთობა 27 სექტემბრიდან დაიძაბა.

9 ოქტომბერს აზერბაიჯანი და სომხეთი ცეცხლის შეწყვეტის შესახებ შეთანხმდნენ. რამდენიმე საათში მხარეებმა ერთმანეთი შეთანხმების დარღვევაში დაადანაშაულეს.

მათ შორის კიდევ ერთი სამშვიდობო შეთანხმება ძალაში 18 ოქტომბერს, ადგილობრივი დროით 00:00 საათზე შევიდა.

თუმცა, ის კვლავ დაირღვა და აზერბაიჯანი და სომხეთი ამაში კვლავ ერთმანეთს ადანაშაულებენ.