„ნადიკვარი“ ტრადიციულად, ადგილობრივი მოსახლეობისა და ტურისტების დასასვენებელი ადგილია და ის, ქალაქის აღმოსავლეთ ნაწილში არსებულ ბორცვზე მდებარეობს. პარკის ჩრდილოეთ ნაწილიდან, თელავის ჩრდილო- აღმოსავლეთის ხედი, ალაზნის ველიდან კავკასიონამდე იშლება.
ადგილობრივი მოსახლეობის ნაწილი და პოლიტიკური პარტიების წარმომადგენლები პროექტს იწუნებენ და ამბობენ, რომ ასეთი ფორმით რეაბილიტაცია, პარკს იერსახეს უკარგავს და მთავარ ღირსებას, ხედებს ფარავს.
თელავის მუნიციპალიტეტის მერიამ ტენდერი პარკის რეაბილიტაციისათვის ოთხჯერ გამოაცხადა. საბოლოო ტენდერში, გამარჯვებული შპს „ბერმუხა“ გახდა, რომელიც „ნადიკვარზე“ პარალელურად, სცენის მოწყობის სამუშაოებზეც მუშაობს.
პარკის რეაბილიტაციის პროექტის ავტორი, კი, ასევე ტენდერით გამოვლენილი კომპანია „რენდერ- არქია“.
ადგილობრივი მოსახლეობის ნაწილი, პროექტით გათვალისწინებული, დიდი რაოდენობით ფანჩატურების მოწყობის წინააღმდეგია.
ეს ადგილი ქალაქის სავიზიტო ბარათია. ათეულობით წლების განმავლობაში, ყველა მნახველი აქ მოდის. გადმოცემა გვეუბნება, რომ ერეკლეც იწვევდა აქ საპატიო სტუმრებს. პარკში იყო ფანჩატურები, მაგრამ მცირე რაოდენობით, რაც ხედს არ ფარავდა და გაუგებარ სურათს არ ქმნიდა.
ამფითეატრს რას უპირებენ, არ ვიცით. ახლა ისე აპირებენ მოწყობას, რომ ხედები საერთოდ აღარ გამოჩნდება და ჩვეულებრივი საყოფაცხოვრებო ადგილი გახდება- განაცხადა ერთ- ერთმა ადგილობრივმა მაია ახალმოსულიშვილმა.
ლეიბორისტული პარტიის კახეთის ორგანიზაციის თავმჯდომარე, ნიკა ვარდოშვილი ამბობს, რომ მიმდინარე პროცესს, როგორც რიგითი თელაველი ისე აპროტესტებს.
წინა ხელისუფლების დროსვე ვამბობდი, როცა ისტორიული გორა შუაზე გაჭრეს და ხიდი გააკეთეს, რომ ამის დამახინჯება არ შეიძლებოდა. ჯერ ერთი ბორცვი, რაზეც „ნადიკვარია“ გააფუჭეს. გარდა ამისა, ეს ხიდი საშიშია, განსაკუთრებით ბავშვებისათვის.
ეს ადგილი უნდა ამოივსოს და ძველი სახე დაუბრუნდეს. გაუგებარი ღობეებით კი არ უნდა შემოიღობოს. რეაბილიტაციის ნაცვლად, პარკის დამახინჯება მიდის- განაცხადა ვარდოშვილმა.
თელავის სახელმწიფო უნივერსიტეტის პროფესორი, თენგიზ სიმაშვილი, რომელიც ძველი თელავის ისტორიას სწავლობს, ამბობს, რომ პარკში ხიდის ადგილი არ არის.
რა უნდა აქ ხიდს? ისტორიულად,არცერთი დოკუმენტი არ გვეუბნება, რომ აქ ხიდი იყო- განმარტავს სიმაშვილი.
თელავის მუნიციპალიტეტის მერიაში განმარტავენ, რომ პარკის რეაბილიტაციის პროექტი უკვე არსებობს და ტენდერიც დასრულებულია.
მუნიციპალიტეტის მერიის ინფრასტრუქტურის სამსახურის წარმომადგენლის, დავით ქსოვრელიშვილის განმარტებით, ხიდი უკვე არსებობდა და მისი მოშლა აღარ შეიძლებოდა. რაც შეეხება ფანჩატურებს, ისინი პარკში იმავე რაოდენობით დარჩება.
ხიდის არსებობას ვეღარ გავექცეოდით. ამიტომ გადაწყდა გალამაზება და უსაფრთხოებისათვის ჯებირების მოწყობა. ფანჩატურები რჩება იმავე რაოდენობით, ძველ იერსახესთან მაქსიმალურად მიახლოებული- განაცხადა ქსოვრელიშვილმა.
„ნადიკვრის“ პარკის რებილიტაციის პროექტის ღირებულება 315. 410 ლარია.
სამუშაოები უახლოეს მომავალში უნდა დაიწყოს და 120 დღის განმავლობაში გაგრძელდეს.
პარკის რეაბილიტაცია 2012 წელსაც განხორციელდა. სამუშაოები მსოფლიო ბანკმა 5. 424. 352 ლარით დააფინანსა.
ავტორი: ხათუნა გულიაშვილი
