შალვა ნათელაშვილის ხმაურიან განცხადებას გერმანიის ელჩის გაწვევასთან დაკავშირებით „ნაციონალური მოძრაობა“ არ იზიარებს.
„პრაიმტაიმთან“ საუბრისას გიორგი ბარამიძე ამბობს, რომ ელჩის გაწვევა მათი საქმე არ არის.
„ელჩის გაწვევის საკითხი ჩვენი საქმე არ არის, არ ვეთანხმები ამ მოწოდებას და მეტს არაფერს ვიტყვი“, – განაცხადა გიორგი ბარამიძემ.
შეგახსენებთ, „ლეიბორისტული პარტიის“ ლიდერი შალვა ნათელაშვილი საქართველოში გერმანიის ელჩის, ჰუბერტ ქნირშის გაწვევას ითხოვს.
„გერმანიას აკისრია უდიდესი ვალდებულება, რომ ჩვენ დღემდე არ გვიღებენ ნატო-ში, რის გამოც რუსეთმა გაბედა ომი და ტერიტორიების წართმევა. ეს გახლავთ ერთ-ერთი მთავარი მიზეზი იმისა, რომ დღემდე სათანადო შეფასება არ არის მიცემული ევროპაში საქართველოს 20 პროცენტის ოკუპაციისთვის და კვლავ აგრძელებს ბერლინი რუსეთთან ჩახუტებას.” – ნათქვამია მის განცხადებაში.
