„ნაციონალური მოძრაობის“ კლასტერი არის ძალიან საშიში კოვიდინფექციის გავრცელების თვალსაზრისით. ვფიქრობ, ისინი მმიზანმიმართულად აკეთებენ იმას, რომ რაც შეიძლება მეტი ადამიანი იყოს დაინფიცირებული“, – ამის შესახებ თბილისის მერმა კახა კალაძემ „ქართული ოცნების“ ოფისში გამართულ ბრიფინგზე ჟურნალისტებთან საუბრისას განაცხადა.
„ჩვენ ვნახეთ ბათუმის აქცია, ვნახეთ სხვა ბევრი შემთხვევები. კონკრეტულად გუშინ რაც ხდებოდა საოლქო კომისიებთან. დაახლოებით 20-მდე პირი იყო შეკრებილი და ცდილობდა დესტრუქციის მოწყობას, ნიღბების გარეშე, სერიოზულ პრობლემას წარმოადგენს ეს ყველაფერი.
კიდევ ერთხელ ვიმეორებ, ეს არის თემა სადაც ყველა უნდა ვიყოთ ერთიანები, უნდა გავუფრთხილდეთ ჩვენი ქვეყნის თითოეულ მოქალაქეს, ეს იქნება ოცნების მხარდამჭერი თუ სხვა პოლიტიკური პარტიის მხარდამჭერი, ამას არ აქვს მნიშვნელობა, რადგან ადამიანის სიცოცხლე და უსაფრთხოება დგას ყველაფერზე მაღლა“, – განაცხადა კახა კალაძემ.
მეხუთე დღეა ოპოზიციის წარმომადგენლები საპარლამენტო არჩევნების შედეგებს აპროტესტებენ. 9 ზღვარგადალახული პარტიიდან 8 პარტია პარლამენტში შესვლას არ აპირებს.
არ წყდება საპროტესტო აქციები. ოპოზიციური პარტიები ცესკოს ხმების მოპარვაში ადანაშაულებენ.
4 ნოემბერს, თბილისის საარჩევნო რამდენიმე ოლქთან ხმაურიანი აქცია გაიმართა. აქცია იყო ასევე რეგიონებში.
