„ერთიანი ნაციონალური მოძრაობის“ მაჟორიტარი დეპუტატობის კანდიდატი, ახმეტა- თელავი- ყვარელი- ლაგოდეხის გაეთიანებულ ოლქში, გიორგი ბოტკოველი, ხელისუფლებას მისი მომხრეების პოლიტიკურ დევნაში ადანაშაულებს.
ბოტკოველის ინფორმაციით, თელავში, კერძო საკუთრებაში არსებულ ობიექტებზე, მისი მხარდამჭერი ბანერების განთავსების შემდეგ, მესაკუთრეების პოლიტიკური ნიშნით დევნა დაიწყო.
„თელავში, საკუთარ სავაჭრო ობიექტზე, სულხან ჭარბაძემ, გამოაკრა ჩემი ბანერი, რის შემდეგაც, მას საშემოსავლო სამსახური შეუგზავნეს და დოკუმენტაციას უმოწმებენ. ყვარელში, ჩემი ბანერის საკუთარ სახლზე განთავსების შემდეგ, 7 სექტემბერს, სამსახურიდან გაანთავისუფლეს სამუსიკო სკოლების გაერთინების დირექტორი, მრავალშვილიანი დედა, თამარ გიგილაშვილი. სოფელ ჩანტლისყურეში, კი, ერთ- ერთ პედაგოგს, საათები გაუნახევრეს. ეს არის პოლიტიკური დევნა და სისხლის სამართლის დანაშაული, ამიტომ ჩვენ განცხადებით მივმართავთ პროკურატურას“ – განაცხადა ბოტკოველმა.
სავაჭრო ობიექტის მესაკუთრემ, სულხან ჭარბაძემ დაადასტურა, რომ საშემოსავლო სამსახური მის ორგანიზაციაში დოკუმენტებს ნამდვილად ამოწმებს.
„ჩემი შემოწმება ყოველთვის არჩევნებს რატომ ემთხვევა? შემამოწმონ, ყველაფერი გამჭვირვალე მაქვს, მაგრამ ახლა, პანდემიის დროს, როცა ბიზნესი სულს ღაფავს, სხვა რა ვარაუდი უნდა მქონდეს?“ .-განაცხადა ჭარბაძემ.
მაჟორიტარი დეპუტატობის კანდიდატის ბრალდებას „ ქართული ოცნების” თელავის შტაბში უპასუხეს. შტაბის ხელმძღვანელის, პლატონ კალმახელიძის განცხადებით, მათ ამ ფაქტებთან კავშირი არ აქვთ.
„არასერიოზულია ამაზე საუბარი. ჩვენ ვართ წინსვლაზე ორიენტირებული პარტია და ბანერებს არ დავდევთ. სასაცილოა, რომ ეს პოლიტიკური პარტია საუბროვს ჩვენი მხრიდან ძალადობაზე და პოლიტიკურ ზეწოლაზე, არ ლაპარაკობს თავად ბიზნესმენი, რომელსაც თითქოს ავიწროებენ. ჩვენ მყარად ვიმარჯვებთ და რეპრესიები არც აქამდე გვჭირდებოდა და არც ახლა გვჭირდება“ – განაცხადა პლატონ კალმახელიძემ.
კახეთის ორ გაეთიანებულ ოლქში, დეპუტატის მანდატის მოსაპოვებლად, „ერთიანი ნაციონალური მოძრაობიდან“ და „ქართული ოცნებიდან“, მაჟორიტარობისათვის ოთხი კანდიდატი იბრძვის.
ავტორი: ხათუნა გულიაშვილი
