ნიკა მელიას განცხადება ძალიან კარგად ნაფიქრი და სწორია, არც გადაფასებაა და არც არ დაფასება იმის, რაც მოხდა. რა თქმა უნდა, ძალიან მნიშვნელოვანი ნაბიჯი გადადგა გიორგი გახარიამ, – ამის შესახებ „მთავარი არხის“ გენერალურმა დირექტორმა ნიკა გვარამიამ განაცხადა.
„ჩვენ ჩვენი შეკითხვები და ეჭვები გვექნება – იყო თუ არა ეს მისი გაგდება და მან დაასწრო გაგდება; იყო თუ არა დაგეგმილი მსხვერპლშეწირვა, რომ სიტუაცია განმუხტულიყო; იმიტომ ხომ არ იყო მელია, რომ გახარია გარბოდა – მილიონი შეკითხვა დაიბადება. შემიძლია კროსვორდივით ჩამოვწერო.
მეხსიერებაში იქნება ყოველთვის 20 ივნისი. მთავარი, რაც ჩვენ მოვისმინეთ ნიკა მელიასა და ოპოზიციისგან, ჩვენ მივაღწიეთ გამარჯვებას, პრემიერი გადადგა. იმიტომ, რომ სისხლისღვრაზე პასუხისმგებლობა აირიდა. თავის განცხადებაში გახარიამას დაადასტურა, რომ სპეცოპერაცია გადაწყვეტილი იყო და მან რომ ეს გააჩერა, იქიდანაც გამოჩნდა, რომ სპეცოპერაცია გადაიდო. ეს ფაქტი არ უნდა დაგვავიწყდეს, დასაფასებელია.
დღეს ბევრად მნიშვნელოვანმა კაცმა, მელიამ თქვა, რომ რეჟიმის ეს დამარცხება კიდევ უფრო ღრმად შესვლაა პოლიტიკურ კრიზისში და ჩვენება, რომ მათ გამოსავალი არ აქვთ, ისინი უნდა წავიდნენ. რეჟიმთან ერთადერთ საკითხზე დავსხდებით და ერთადერთ საკითხზე, ვადამდელ არჩევნებზე ვილაპარაკებთ. ეს იყო სწორად ნაფიქრი, ძალიან დაბალანსებული, ზომიერი, მათ შორის ემოციურადაც სახელმწიფო მოღვაწის სიტყვა, ვულოცავ ნიკა მელიას, ასეთი რამ ბევრს არ ძალუძს“, – განაცხადა გვარამიამ პირდაპირ ეთერში.
დღეს, პრემიერმინისტრი გიორგი გახარია, თანამდებობიდან გადადგა. მან ეს გადაწყვეტილება ნიკა მელიას საქმეს დაუკავშირდა. გიორგი გახარიას თქმით, მისი ურყევი პოზიციაა, რომ “ერთი კონკრეტული ადამიანის მიმართ თუნდაც კანონიერი, მართლმსაჯულებით განსაზღვრული ღონისძების აღსრულება, თუ ეს რისკს უქმნის ჩვენი მოქალაქეების ჯანმრთელობას, სიცოცხლეს ან საერთოდ ქვეყანაში ქმნის პოლიტიკური ეკალაციის შესაძლებლობას, არის მიუღებელი”.
გახარიას გადადგომასთან დაკავშირებით, შინაგან საქმეთა სამინისტრომ ნიკანორ მელიას საქმეზე დაგეგმილი ღონისძიება დროებით გადადო.
