გაერთიანებული ოპოზიციის გლდანის რაიონის მაჟორიტარი დეპუტატობის კანდიდატი, ნიკა მელია აცხადებს, რომ მის საარჩევნო შტაბთან მოწყობილი „ქართული მარშის“ აქცია „ქართული ოცნების“ დავალებით ჩატარდა.
როგორც იგი ამბობს, აქცია „ქართული ოცნების“ პირდაპირ ინტერესებში შედიოდა.
„არ ვიცი, ვის ინტერესში, ბატონი კობიაშვილის, კალაძის თუ ვისი, მაგრამ გლდანის რაიონს ხელისუფლება ოპოზიციასთან პირველივე ტურში დიდი სხვაობით აგებს. არ ვიცი, რა ვერ გათვალა ხელისუფლებამ, როდესაც მათ მიერ წინა ხაზზე წამოწეული იქნება “ქართული მარში” და ეს სხვაობა ოპოზიციასთან მიმართებით მათივე საწინააღმდეგოდ კიდევ უფრო გაიზრდება.
გუშინ უბრალოდ, ვერ გათვალეს, ხელისუფლება რასაც აკეთებს ყველაფერი ისევ მისთვის არის კონტრპროდუქტიული . გუშინდელი დღე ამის ილუსტრაცია იყო. დიახ, კიდევ უფრო მეტი ენერგია, მოტივაცია გვაქვს, რომ დავამარცხოთ ყველა, ვინც მზად არის ფულის სანაცვლოდ უკადრებელიც კი იკადროს და გუშინ ასეთი ხალხი დავინახეთ ჩვენ. ამით მეტი არაფერი იყო ნათქვამი – ვიღაცამ გადაიხადა, ვიღაცამ შეასრულა, გადამხდელიც ვიცით და შემსრულებელიც დავინახეთ“, – განაცხადა მელიამ.
ცნობისთვის, გუშინ, „ქართული მარშის“ წევრებმა გლდანში, „ნაციონალური მოძრაობის“ გლდანის მაჟორიტარი დეპუტატობის კანდიდატის, ნიკა მელიას ოფისთან აქცია გამართეს.
