როჯერ ფედერერის დამარცხების შემდეგ, ქართველმა ჩოგბურთელმაც ნიკოლოზ ბასილაშვილმა კიდევ ერთი მნიშვნელოვანი გამარჯვება მოიპოვა, მან ტეილორ ფრიცს ორ სეტში – 7:6, 6:1 აჯობა, რითიც დოჰას უპრესტიჟულესი ტუნრირის ფინალში გავიდა.
ქართველი და ამერიკელი ჩოგბურთელები აქამდე კორტზე ერთმანეთს ერთხელ, 2017 წელს შენჟენის ტურნირზე გადაყროდნენ და მაშინ ტეილორ ფრიცმა გაიმარჯვა.
მატჩი ქართველმა ჩოგბურთელმა მძიმედ დაიწყო და ბრეიქით აგებდა, თუმცა ვითარების გამოსწორება შეძლო და პარტია ტაიბრეიქში მოიგო. მეორე სეტში კი ნიკოლოზ ბასილაშვილმა მეტოქეს მცირე მასტერკლასი ჩაუტარა და დამაჯერებლად აჯობა.
დოჰას ტურნირის ფინალში ნიკოლოზ ბასილაშვილის მეტოქე ესპანელი რობერტო ბაუტისტა-აგუტი იქნება, რომელმაც თავისმხრივ რუს ანდრეი რუბლევს აჯობა.
