სახალხო დამცველმა, ნინო ლომჯარიამ თავისივე შექმნილ ექიმთა ჯგუფთან ერთად მიხეილ სააკაშვილი გორის ჰოსპიტალში მოინახულა. როგორც ლომჯარიამ შეხვედრის შემდეგ განაცხადა, ექიმთა ჯგუფის დასკვნა მიხეილ სააკაშვილის ჯანმრთელობის საკითხზე მას შემდეგ გახდება ცნობილი, რაც მაც მედიკოსები ინფორმაციას ერთობლივად შეაჯერებენ.
ლომჯარიას თქმით, მიხეილ სააკაშვილთან დაკავშირებით პრობლემა მრავალმხრივია.
რაც შეეხება სააკაშვილის მკურნალობის საზღვარგარეთ შესაძლო გაგრძელებას, ლომჯარიას თქმით, ჯერ უნდა გაკეთდეს ჯანმრთელობის შეფასება.
„რეკომენდაციასაც დაწერენ ექიმები. მე არ ვერევი ამ რეკომენდაციებში, თუ იქნება მსგავსი შეფასება შეფასება ექიმების მხრიდან, რა თქმა უნდა, სახალხო დამცველი მხარს დაუჭერს ამ რეკომენდაციების განხორციელებას. უფლებრივ მდგომარეობას რაც შეეხება, როგორც თავად მიხეილ სააკაშვილმაც მითხრა, დისციპლინური საკითხი გამოიხატა საუბრის უფლების შეზღუდვაში, რაც ისედაც შეზღუდული ჰქონდა მას სხვადასხვა მიმდინარე საქმიდან გამომდინარე. დღეს ტელევიზორს უყურებს, თუმცა, მე რაც პრობლემურად მეჩვენება არის ის, რომ მას არ აქვს ღია სივრცე, სადაც ის, როგორც პატიმარი ისარგებლებდა სეირნობის უფლებით. როგორც ვიცი, მას სჭირდება უფრო მეტი ფიზიკური დატვირთვა და ეს საკითხებიც იქნება განხილული“, – განაცხადა ლომჯარიამ.
