ოპოზიციური პარტიების წარმომადგენლებმა გასვლითი შეხვედრები კახეთიდან დაიწყეს.
პირველი შეხვედრა, თელავის მუნიციპალიტეტის მოსახლეობასთან მიმდინარეობს.
„ერთიანი ნაციონალური მოძრაობის“ პოლიტსაბჭოს წევრის, გიორგი ბოტკოველის განმარტებით, 15 მაისი ცვლილებების დაწყების დროდ უნდა იქცეს.
„15 მაისი არის მნიშვნელოვანი დღე, ვისაც აწუხებს პრობლემები და ყველა უნდა შემოგვიერთდეს ცვლილებებისთვის. დღევანდელი ჩამოსვლის მიზანია, ყველა ადამიანამდე მივიტანოთ რას ნიშნავს დაგეგმილი აქცია. ჩვენ, ყველა ოპოზიციური პარტია ყველაფერს გავაკეთებთ იმისთვის, რომ მეტ ადამიანამდე მივიდეთ. ცვლილებები აუცილებელია და ამისთვის ბრძოლას ვიწყებთ“,- განაცხადა ბოტკოველმა.
მანამდე, თელავში ოპოზიციის ლიდერებმა, ერთიანი ნაციონალური მოძრაობის ოფისში, დახურული შეხვედრა ჩაატარეს და სამოქმედო გეგმა განიხილეს.
შეგახსენებთ, 15 მაისს, რუსთაველის გამზირზე ოპოზიცია დიდი საპროტესტო აქციის ჩატარებას გეგმავს.
მუშაობის საგანგებო რეჟიმზე გადასვლის შესახებ, ოპოზიციურმა გაერთიანებამ, განცხადება 20 მარტს გააკეთა.
ავტორი: ხათუნა გულიაშვილი
