31 ოქტომბრის საპარლამენტო არჩევნებში „ქართული ოცნების“ გამარჯვებაში დარწმუნებულია მმართველი პარტიის წევრი გურამ მაჭარაშვილი. როგორც მან „პრაიმტაიმნიუსთან“ საუბრისას განაცხადა, „ქართული ოცნება“ ოპოზიციას მნიშვნელოვანი შედეგით დაამარცხებს.
ამასთან, მაჭარაშვილმა „ნაციონალური მოძრაობა“ რევოლუციის მზადების მოწყობაში დაადანაშაულა და განაცხადა, რომ ეს პარტია დესტაბილიზაციის მოწყობისთვის ემზადება.
„არა მხოლოდ ჩვენ ვამბობთ, რომ „ნაცმოძრაობა“ გეგმავს პროვოკაციის მოწყობას, არამედ ამას თვითონაც აღარ მალავენ. მაგალითად, ამ პარტიის წევრებმა აქციის გამართვა მოითხოვეს არჩევნების დღეს. თავად მიხეილ სააკაშვილი ამბობს, რომ ეს ხელისუფლება ნებისმიერი მეთოდით უნდა დასრულდეს და ხალხს მოუწოდებს ქუჩაში გამოსვლისკენ.
მათი სტილი არის რევოლუცია, რომლის მზით უნდათ ხელისუფლებაში მოსვლა. სხვადასხვა ლოკაციებზე მათ დაგეგმილი აქვთ გარკვეული ტიპის პროვოკაციები, თუმცა დარწუნებული ვარ, რომ ეს არ გამოუვათ.
არჩევნები მშვიდად ჩატარდება. „ქართული ოცნების“ დამაჯერებელი გამარჯვება გაფორმდება, როგორც ამას ჩვენი პარტნიორი ქვეყნების ელჩები აღიარებენ კიდეც. თუ დააკვირდებით, ნახავთ, რომ მათ გამოსვლებში ეჭვი აღარ არის გამარჯვებაზე“,- განაცხადა მაჭარაშვილმა.
კითხვაზე, რამდენი პროცენტის აღების შანსი აქვს „ქართულ ოცნებას“ არჩევნებში, მაჭარაშვილი გვპასუხობს, რომ 50%-ზე გაცილებით მეტის.
„მიუხედავად არსებული გამოწვევებისა, რასაც საზოგადოების წევრები თავადაც გვეუბნებიან, აბსოლუტური უმრავლესობის მხარდაჭერა აქვს „ქართულ ოცნებას“ . როგორც ყველა კვლევაში გამოქვეყნდა, 55%-ზე ნაკლები „ქართულ ოცნებას“ არ აქვს, ეს იქნება გაცილებით მეტი, ვიდრე 50%“,- განაცხადა მაჭარაშვილმა.
ინფორმაციისთვის, 31 ოქტომბერს საპარლამენტო არჩევნები შერეული საარჩევნო სისტემის პირობებში გაიმართება.
