ფარმაცევტული კომპანია Pfizer-ის აღმასრულებელი დირექტორი, ალბერტ ბურლა დარწმუნებულია, რომ კომპანიის კოვიდსაწინააღმდეგო აბები „ომიკრონი“ ვარიანტის წინააღმდეგ ეფექტური იქნება.
„კარგი ამბავი ის არის, რომ როდესაც საქმე ჩვენს პრეპარატს ეხება, ის ამის გათვალისწინებით იყო შემუშავებული. ის შეიქმნა იმ ფაქტის გათვალისწინებით, რომ მუტაციების უმეტესობა სპაიკ-ცილებში ხდება. ასე რომ, ეს მარწმუნებს, რომ ვირუსი პერორალურ მკურნალობაზე გავლენას არ მოახდენს“, – აღნიშნა ფარმაცევტული კომპანია Pfizer-ის აღმასრულებელმა დირექტორმა.
შეგახსენებთ, 5 ნოემბერს, Pfizer-მა განაცხადა, რომ მისი კორონავირუსის საწინააღმდეგო აბები ჰოსპიტალიზაციისა და სიკვდილიანობის მაჩვენებელს თითქმის 90%-ით ამცირებს.
17 ნოემბერს, Pfizer-მა აშშ-ის სურსათისა და მედიკამენტების ადმინისტრაციას (FDA) კორონავირუსის საწინააღმდეგო აბების ავტორიზაციის თხოვნით მიმართა.
