ფოთში, გვიან ღამით მოსული ძლიერი წვიმის შედეგად რამდენიმე ცენტრალური ქუჩა დაიტბორა. გადაადგილება უჭირთ როგორც ქვეითად მოსიარულეებს, ისე მსუბუქ ავტომანქანებს. წყალმა შეაღწია საცხოვრებელი სახლების ეზოებშიც.
ადგილობრივები აცხადებენ, რომ ყოველი მოსული უხვი ნალექის დროს ეს პრობლემა აწუხებთ.
„წლებია ეს პრობლემა დგას და ამ დრომდე ვერ გვარდება. ყოველი უხვი ნალექის მოსვლას შიშით ველოდებით. ხელისუფლებამ ეს საკითხი ოდესღაც ხომ უნდა გადაჭრას?“- აცხადებს ერთ-ერთი ადგილობრივი.
ფოთის მერიის პრესსამსახურში აცხადებენ, რომ ყველა სატუმბი სადგური გამართულად მუშაობს.
„რვავე სატუმბი სადგური გამართულად მუშაობს და ქუჩების დატბორვა უხვმა ნალექმა გამოიწვია. ამ წუთებში მობილიზებულია ყველა სამსახური. ყველა სატუმბი სადგური უწყვეტ რეჟიმში მუშაობს,” – აცხადებენ მერიის პრესსამსახურში.
ავტორი: თეა შონია
