გაერთიანებული ოპოზიციის წევრის, მურმან დუმბაძის განცხადებით, „ძალა ერთობაშიას“ კანდიდატი ლევან ვარშალომიძე საპარლამენტო არჩევნებში პირველივე ტურში გაიმარჯვებს.
ამის შესახებ დუმბაძემ აჭარის ტელევიზიაზე, ვახო ხუზმიაშვილის გადაცემა „თავისუფალ სივრცეში“ სტუმრობისას ისაუბრა.
„ბატონი ლევან ვარშალომიძის კანდიდატურის დასახელებაში თავიდანვე აქტიურად ვიყავი ჩართული. ერთ-ერთ ტელევიზიაში ვთქვი, რომ მისი პერსონა სახელს და გვარს გასცდა, იმიტომ რომ ლევან ვარშალომიძეს სხვა შედეგები აქვს მიღებული. უნდა მენდოს, განსაკუთრებით მისი ოპონენტები უნდა მენდონ, იმიტომ რომ პოლიტიკაში ყოფნის მათზე გაცილებით უკეთესი გამოცდილება მაქვს, მათზე უფრო უკეთესად შემიძლია პროგნოზების გაკეთება. გარწმუნებთ, რომ ვარშალომიძის შემთხვევაში ქალაქ ბათუმში პირველსავე ტურში დასრულდება მაჟორიტარული წესით არჩევნები და ლევან ვარშალომიძე გახდება საქართველოს პარლამენტის წევრი ბათუმიდან“, – განაცხადა მურმან დუმბაძემ.
„მე იმხელა პოლიტიკური გამოცდილება მაქვს უნდა მენდოთ, სხვა ოპოზიციას წარმატებას ვუსურვებ, მაგრამ გაიმარჯვებს ლევან ვარშალომიძე პირველივე ტურში“- განაცხადა „ემსახურე საქართველოს“ ლიდერმა, გაერთიანებული ოპოზიციის „ძალა ერთობაშია“-ს წევრმა მურმან დუმბაძემ აჭარის საზოგადოებრივი მაუწყებლის ეთერში, ვახო ხუზმიაშვილის საავტორო გადაცემა „თავისუფალ სივრცეში“.
Posted by აჭარის ტელევიზია • Ajara TV – საზოგადოებრივი მაუწყებელი on ორშაბათი, 28 სექტემბერი, 2020
