თავდაცვისა და უშიშროების კომიტეტის თავმჯდომარე ირაკლი სესიაშვილი პარლამენტში თავდაცვის მინისტრის ანგარიშის შემდეგ სიტყვით გამოვიდა და ირაკლი ღარიბაშვილს მიმართა.
„თქვენ რომ ტრიბუნასთან ბრძანდებოდით, ბატონ ირაკლი ოქრუაშვილს უთქვამს, რომ ირაკლი ღარიბაშვილი სამსახურში არ მივიღეო, ინტელექტი დაგიწუნათ.
არ მივცემ საკუთარ თავს უფლებას რომ ვინმეს ინტელექტი შევაფასო. ოქრუაშვილის ინტელექტი შეაფასა სააკაშვილმა მაშინ როცა მინისტრად დანიშნა. ეს ის ოქრუაშვილია, რომელიც შემდეგ იძახდა რომ სააკაშვილი პოლიტიკური მკვლელობის შემკვეთიაო და რომ დაიჭირეს ოქრუაშვილი და გააპარეს, სააკაშვილმა აღძრა სისხლის სამართლის საქმე და კონკრეტული ბრალდება იყო, ირაკლი ოქრუაშვილი ცხინვალიდან აპირებდა რუს სპეცრაზმთან ერთად შემოსვლას და ქართულ საგუშაგოებზე თავდასხმასო.წარმოიდგინეთ ორი მძიმე ბრალდების მქონე პოლიტიკური ძალა და ერთმა დანიშნა მეორე.
ოქრუაშვილი დღეს გვეუბნება გადავამლაშეო, სააკაშვილი ამბობს არამგონია ახლა ეს ისეთი რამე იყოს რომ ვერ დავივიწყოთო. რუსულ სპეცრაზმთან ერთად თავდასხმას აპირებდა და სააკაშვილი დაივიწყებს და რა პრობლემაა, ან ის პოლიტიკური მკვლელობის შემკვეთია და გადაამლაშა რა მოხდა.
ბატონო ირაკლი გული არ გეტკინოთ ასეთ ხალხს რომ გაუხარდეთ, რომ უმაღლესი ხარისხის ფეხსაცმელს ძირი გასძვრეს, ამათ პოლიტიკური ძირი უკვე დიდი ხანია გამძვრალი აქვთ“,- განაცხადა ირაკლი სესიაშვილმა.
დღეს, პოლიტიკური პარტია „გამარჯვებული საქართველოს“ ლიდერმა ირაკლი ოქრუაშვილმა განაცხადა, რომ ირაკლი ღარიბაშვილი სამსახურში არ მიიღო.
