„ის რაც ახლა პარლამენტში გააკეთეს, არასდროს არ უნდა განმეორდეს. ეს არის ის რაც უნდა რუსეთს, ქაოსი, არეულობა და დესტაბილიზაციის მცდელობა“,- ამის შესახებ უმრავლესობის წევრმა, ირაკლი ზარქუამ მიმდინარე მოვლენებთან დაკავშირებით განაცხადა.
როგორც ზარქუა ამბობს, პრემიერი არ გადადგება, რადგან ამის საფუძველი არ არსებობს.
„ჩვენ გვახსოვს აქციები სადაც ოპოზიცია ითხოვდა გადადგეს ხელისუფლებაო და შემდეგ პარლამენტში შემოვიდნენ. ახლაც ანალოგიურად ცხელ გულზე არიან. ეს არ არის დაკვეთა მოსახლეობის. ჩვენ გვაქვს გამოწვევები, ეს არის უმუშევრობა, დასაქმება და ა.შ. პრემიერი არ გადადგება, ამის საფუძველი არ არსებობს. მთავრობა მუშაობს იმ გამოწვევებზე და პრობლემებზე, რომელიც მოსახლეობას აწუხებს“,- აცხადებს ზარქუა.
იგი ჟურნალისტებზე ძალადობის ფაქტებსაც ეხმაურება.
რაც შეეხება 5-6 ივლის განვითარებულ მოვლენებს, ეს არის ტრაგედია, ეს არის უბედურება ჩვენი ქვეყნისთვის. აქ დამნაშავე ვართ ყველა, ერიც და ბერიც. აქ გამართლება არავის არ აქვს. განსაკუთრებული პასუხისმგებლობა ეკისრება იმ 6 დღიანი მარათონის ჩამტარებლებს და მეორეს მხრივ იმათ, ვინც ჟურნალისტებზე ნადირობა ჰქონდათ გამოცხადებული. ჩვენი პასუხისმგებლობა რა იყო, დაგვეცა ისინი. მაქსიმალურად შეძლო ხელისუფლებამ დაეცვა, თუმცა 5 ივლისს ეს მოხდა დილას 11 საათზე სადაც პრაიდი არც იყო დაწყებული და მაშინ მოხდა ჟურნალისტებზე თავდასხმა, რაც კატეგორიულად მიუღებელია. დღესაც დააკავეს 2 ადამიანი და ხვალაც გაგრძელდება.
რაც შეეხება თქვენი კოლეგის გარდაცვალებას, კიდევ ერთხელ ვგმობთ ძალადობას ჟურნალისტებზე. გამოძიებას ველოდებით. შეგნებულად გუშინ, მთელი დღის განმავლობაში ხმა არ ამოგვიღია, იმიტომ რომ არის გარკვეული მიმართულებები, სადაც თემები იკვეთება და ამასთან დაკავშირებით როცა იქნება ექსპერტიზის ოფიციალური დასკვნა, მერე მოგვეცემა ყველას საშუალება, ჩვენც და თქვენც რომ ვთქვათ, რამ გამოიწვია ეს ტრაგიკული შემთხვევა“,- განაცხადა ირაკლი ზარქუამ.
ცნობისთვის, ამ დროისთვის პარლამენტში ხმაური ისევ გრძელდება. რიგგარეშე სხდომა საკანონმდებლო ორგანოში შექმნილი აურზაურის გამო ვერ ტარდება. პარლამენტში არც ჟურნალისტების ნაწილს უშვებენ.
აქციის მონაწილეების მოთხოვნებია: ირაკლი ღარიბაშვილის მთავრობის დაუყოვნებლივ გადადგომა; მომხდარის დამოუკიდებელი ექსპერტებით გამოძიება; ყველა იმ მოძალადის დაკავება და კანონის სრული სიმკაცრით დასჯა, რომლებიც ლექსო ლაშქარავას დაესხნენ თავს, ასევე, ძალადობრივი აქციის ორგანიზატორების პასუხისმგებლობაში მიცემას.
