გაუპატიურებაში ბრალდებულ უკვე ყოფილ პოლიციელს აღკვეთის ღონისძიების სახით თბილისის საქალაქო სასამართლომ პატიმრობა შეუფარდა.

ზაზა ალავერდაშვილს 35-წლამდე ქალის გაუპატიურებაში ედება ბრალი. პოლიციამ ის საკუთარ საცხოვრებელ სახლში, ორი დღის წინ დააკავა.

დღეს გამართულ სასამართლო პროცესზე, დაცვის მხარემ გირაოს სახით 5 000 ლარი შესთავაზა, თუმცა მოსამართლემ ეს შუამდგომლობა არ დააკმაყოფილა და ბრალდებული პატიმრობაში დატოვა.

თავად ზაზა ალავერდაშვილი ბრალს არ აღიარებს. ადვოკატის, ბონდო ვათიაშვილის ინფორმაციით, მისი დაცვის ქვეშ მყოფი დაზარალებულის განცხადების საფუძველზე დააკავეს.

,,22 ივლისს წარუდგინეს ბრალი ჩემი დაცვის ქვეშ მყოფს. ამ ეტაპზე ბრალდებული დუმილის უფლებას იყენებს, რაც იმას ნიშნავს, რომ თავს დამნაშავედ არ ცნობს. გაუთქმელობის შესახებ ხელწერილი ჩამომერთვა, რადგან საქმე პირადი ცხოვრების ამსახველ დეტალებს ეხება, რისი გახმაურების უფლებაც არ მაქვს. იმაზე კი ვერაფერს მოგახსენებთ, რაც ბრალდებულმა პირად საუბარში მითხრა”, – განაცხადა ბონდო ვათიაშვილმა.

გამოძიება სისხლის სამართლის კოდექსის 137-ე მუხლის პირველი ნაწილით მიმდინარეობს, რაც გაუპატიურებას გულისხმობს. ბრალის დამტკიცების შემთვევაში დანაშაული თავისუფლების აღკვეთით ექვსიდან რვა წლამდე ვადით ითვალისწინებს.