“სტრატეგია აღმაშენებლის” ერთ-ერთი ლიდერის, გიორგი ვაშაძის განცხადებით, ყველა ოპოზიციური პარტია ხელისუფლებასთან მოლაპარაკებისთვის მზად არის. ამის შესახებ მან ჟურნალისტებთან საუბრისას განაცხადა.
“გვექნება კომუნიკაცია ინდივიდუალურადაც დიპლომატიურ კორპუსთან. სიტუაცია ძალიან მძიმეა. ყველას მოვუწოდებთ, რომ ნუ გავაკეთებთ ისეთ განცხადებებს, რომელიც უფრო ჩიხში შეიყვანს ამ პროცესს. მათ შორის მოვუწოდებ “ქართულ ოცნებას”, ასევე თითოეულ ოპოზიციის მხარეს. მე, როგორც ვიცი, ყველა ოპოზიციური პარტია მზადაა მოლაპარაკებისთვის, განსხვავებული აზრი არ მომისმენია ამასთან დაკავშირებით. წინაპირობების დაყენება, რაც გვესმის “ქართული ოცნების” მხრიდან ბოდიშებთან დაკავშირებით და ა.შ. ვფიქრობ, რომ ხელს უშლის თავიდან ბოლომდე ამ პროცესს.
დიდი მადლობა მინდა ვუთხრა ელჩებს, ამერიკისა და ევროკავშირის ელჩებს, რომლებიც ასე გამძლეობით ეკიდებიან ამ მძიმე ვითარებას, რომელიც ქვეყანაშია. მათი ფუნქცია არ არის ის რომ ყოველწლიურად ოპოზიციასა და ხელისუფლებას შორის მედიატორის როლი ასრულონ. მაგრამ იმ მძიმე ვითარებიდან გამომდინარე, რომელიც დღეს ქვეყანაშია სხვა გამოსავალი არ გვაქვს, იმიტომ რომ ძალიან დიდი უნდობლობაა”, – განაცხადა ვაშაძემ.
