ქობულეთის მუნიციპალიტეტის კიდევ ორ სოფელში ცოფის შემთხვევები დაფიქსირდა.
არსებული ინფორმაციით,სოფელ წყავროკაში ინფიცირებულმა ტურამ ძაღლი დაკბინა,  ხოლო სოფელ ცხრაფონაში ერთ-ერთი ადგილობრივის საკარმიდამო ნაკვეთში ტურის ლეში იპოვეს. ორივე შემთხვევაში ცოფი ლაბორატორუულად დაუდასტურდა.

ორივე სოფელში და 2-3 კილომეტრის რადიუსში მდებარე სოფლებში სურსათის ეროვნული სააგენტო ცხოველების იძულებით ვაქცინაციას იწყებს.

ასევე სოფელ ცხრაფონაში და წყავროკაში ორთვიანი საკარანტინო რეჟიმი გამოცხადდება.
ქობულეთის მერიის ინფორმაციით, სურსათის უვნებლიბის სამსახურიდან ოფიციალური მიმართვის შემდეგ, აღნიშნულ სოფლებში კარანტინი გამოცხადდება.

„ველოდებით სურსათის უვნებლობიდან დოკუმენტურ წერილობით მომართვას. გამოცხადდება 60 დღიანი კარანტინი.’ იმ ოჯახში, სადაც ინფიცირებული ცხოველი იყო, მიეცემათ რეკომენდაცია, გაიკეთონ აცრები. განხორციელდება ცხოველთა ვაქცინაცია.
მოსახლეობა ინფორმირებული იქნება, თუ რას ნიშნავს კარანტინი. ეს არ გულისხმობს სოფლის ჩაკეტვას. მოქალაქეებს გადაადგილება არ შეეზღუდებათ. აიკრძალება რძისა და ხირცპროდუქტების რეალიზება, არ უნდა მოაწყონ ბაზრობა და ცხოველები სადგომებში უნდა ყავდეთ“, – აცხადებენ უწყებაში.

შეგახსენებთ,  პირველად ცოფის შემთხვევები დაფიქსირდა სოფელ ჯიხანჯურში. პირველი შემთხვევა 22 დეკემბერს,  ბოლო კი 11 იანვარს. აღნიშნულ სოფელში კარანტინი არის გამოცხადებული 11 მარტამდე.

ავტორი: ნაირა ქობულაძე