ქობულეთის მუნიციპალიტეტში დილიდან მოსულმა თოვლმა გარკვეული პრობლემები შექმნა. ქობულეთის მუნიციპალიტეტის ქობულეთი-ბათუმის დამაკავშირებელი ცენტრალური გზის ციხისძირის მონაკვეთზე მსუბუქი ავტომობილი სავარაუდოდ მოცურდა და გზიდან გადავარდა. შემთხვევის შედეგად არავინ დაშავებულა. ადგილზე სამართალდამცავები იმყოფებიან.
ავტომობილის შემთხვევის ადგილიდან ევაკუაციისთვის სპეციალური ტექნიკის გამოძახება გახდა საჭირო.
დაბა ჩაქვში მეშვიდე რაიონის ტერიტორიაზე შიდა საავტომობილო გზაზე მეწყერი ჩამოწვა, რამაც მოძრაობის შეფერხება გამოიწვია.
შეფერხებაა სოფელ ჩაქვისთავის მიმართულებითაც.
აჭარის საავტიმობილო გზების დეპარტამენტის ინფორმაციით, ამ ეტაპზე ინტენსიურ რეჟიმში ხორციელდება გზების თოვლის საფარისგან გაწმენდითი სამუშაოები და მნიშვნელოვანი პრობლემები არ აღინიშნება ქობულეთის მუნიციპალიტეტში.
„სამი მიმართულებით მიმდინარეობს გაწმენდითი სამუშაოები ქობულეთის მუნიციპალიტეტში. ჩაქვში თითქმის დასრულებულია გაწმენდითი სამუშაოები და აღმოფხვრილია შეფერხება. გაწმენდითი სამუშაოები მიმდინარეობს ქობულეთის ორ სოფელში, ქაქუთი-ნაცხავატევი და ქაქუთი-გოგმეჩაურის მიმართულებით, სადაც თოვლის საფარი 20-25 სანტიმეტრს აღწევს. მიმდინარეობს ინტენსიური გაწმენდითი სამუშაოები. მობილიზებულია მძიმე ტექნიკა. ამ ეტაპზე არანაირი შეფერხება გადაადგილებაზე ქობულეთში არ არის. თოვლსა და მეწყერს მოსახლეობისათვის საფრთხე არ შეუქმნია“,- აცხადებენ უწყებაში.
ბათუმი-ქობულეთის დამაკავშირებელ გზაზე ავტომანქანების უსაფრთხო გადაადგილებას საპატრულო პოლიციუს ეკიპაჟები აკონტროლებენ.
ავტორი: ნაირა ქობულაძე
