ქუთაისში 30 წლის ახალგაზრდა ქალის მკვლელობისთვის ბრალდებულს, 45 წლის ქალს ბრალს დღეს წარუდგენენ. ამის შესახებ დაკავებულის ადვოკატი აცხადებს.

ადვოკატის თქმით, მისი დაცვის ქვეშ მყოფი მძიმე ფსიქოლოგიურ მდგომარეობაშია და მომხდარის დეტალებს ეტაპობრივად იხსენებს.

„ის არის მძიმე ფსიქიური სტრესის მდგომარეობაში. გარკვეულ დეტალებს ახლა იხსენებს. ამ დეტალების დაზუსტების მიზნით თანამშრომლობს გამოძიებასთან. რაც შეეხება აღიარების საკითხს, თვითინკრიმინირებასთან დაკავშირებით მოვლენებს წინ არ გავუსწრებ, არ დავარღვევ მის უფლებებს და თავს შევიკავებ კომენტარის გაკეთებისგან. დეტალები გაირკვევა საქმის მსვლელობის განმავლობაში. სიმართლის დადგენის სურვილი და ინტერესი ჩემი დაცვის ქვეშ მყოფსაც აქვს“, – ამბობს ადვოკატი ესმა ნორაკია.

შეგახსენებთ, 30 წლის ელისო ჩეჩელაშვილის მკვლელობის საქმეზე სამართალდამცავებმა იმ ბინის მცხოვრებლებიც დააკავეს, სადაც 18 ივლისს მკვლელობა მოხდა.

გამოძიების ინფორმაციით, დაკავებულია 45 წლის ქალი, რომელმაც თავის მეგობარ ახალგაზრდა ქალს სტუმრად ყოფნის დროს, ურთიერთშელაპარაკების ნიადაგზე, ცივი იარაღით რამდენიმე ჭრილობა მიაყენა და ადგილიდან მიიმალა.

გამოძიება სსკ-ის 108-ე მუხლით მიმდინარეობს, რაც განზრახ მკვლელობას გულისხმობს.