ანტიკრიზისული გეგმის ფარგლებში დაწესებული დახმარება ქუთაისში 1055-მა ოჯახმა ვერ მიიღო.
სოციალური მომსახურების სააგენტოში განმარტავენ, რომ პროგრამაში მხოლოდ 1 412 ოჯახი მოხვდა. სააგენტოს იმერეთის ცენტრის უფროსი ნინო ჭიღლაძე ამბობს, რომ თანხა იმ ოჯახებმა მიიღეს, ვინც შესაბამისი კრიტერიუმები დააკმაყოფილა.
„კომპენსაციის მიღების უფლება აქვთ სოციალურად დაუცველ ოჯახებს, რომელთაც 65 000-დან 100 001-მდე სარეიტინგო ქულა აქვთ. ასევე, 100 000 ან ნაკლები სარეიტინგო ქულის მქონე ოჯახებს, რომლებსაც ჰყავთ არასრულწლოვანი სამი ან მეტი ბავშვი, მკვეთრად გამოხატული შეზღუდული შესაძლებლობის მქონე პირებს და 18 წლამდე შშმ ბავშვებს“,- ამბობს ნინო ჭიღლაძე.
ქუთაისში ყველა გაჭირვებული ოჯახი სტანდარტულ სოციალურ დახმარებას ვერ იღებს. სააგენტოს ინფორმაციით, ბაზაში სულ 2 467 ოჯახია დარეგისტრირებული, თუმცა მათგან შემწეობას მხოლოდ 1 766 იღებს.
