ქუთაისში კოვიდკლინიკების თანამშრომელთა ტრანსპორტირებას სახელმწიფო უზრუნველყოფს. ამის შესახებ ისაუბრეს იმერეთის სახელმწიფო რწმუნებულთან, ზვიად შალამბერიძესთან კოვიდის წინააღმდეგ ბრძოლაში ჩართული კლინიკების ხელმძღვანელებმა.
მხარეებმა კორონავირუსით ინფიცირებულთა რაოდენობის მზარდ დინამიკასა და არსებული გამოწვევების გადაჭრის გზებზე ერთობლივად იმსჯელეს.
ასევე, შეხვედრის მონაწილეებმა, სამედიცინო დაწესებულებებში არსებული მდგომარეობაც შეაფასეს. კოვიდკლინიკების ხელმძღვანელების ინფორმაციით, ხორციელდება მხოლოდ მძიმე შემთხვევების ჰოსპიტალიზაცია, ასევე სტაციონარებში საწოლფონდის შესაძლო დეფიციტის პრევენციის მიზნით, მუდმივად ტარდება შესაბამისი ღონისძიებები.
„სახელმწიფო რწმუნებულმა დღევანდელ შეხვედრაზე ასევე განიხილა საქართველოში არსებული ეპიდემიოლოგიური ვითარების გათვალისწინებით, პრემიერ-მინისტრის ხელმძღვანელობით მოქმედი უწყებათაშორისი საკოორდინაციო საბჭოს მიერ ქვეყანაში მოქმედი წერტილოვანი შეზღუდვების გამკაცრებისა და გაფართოების შესახებ მიღებული გადაწყვეტილების აღსრულების საკითხი. მხარეებმა იმ მედპერსონალის ტრანსპორტირებაზე იმსჯელეს, რომლებიც ქუთაისში არსებულ სამედიცინო დაწესებულებებში მუშაობენ და იმერეთის სხვადასხვა მუნიციპალიტეტში ცხოვრობენ.
გამომდინარე იქედან, რომ შეიზღუდა მგზავრების რეგულარული საქალაქთაშორისო გადაყვანა, მათ შორის – რკინიგზით, ავტობუსით და სამარშრუტო ტაქსით, სპეციალურად გამოყოფილი ტრანსპორტით მოხდება მათი ჩამოყვანა, კლინიკებს არ ექნებათ თანამშრომელთა რესურსის ნაკლებობა და ჩვეულ რეჟიმში გააგრძელებენ მუშაობას,” – ნათქვამია სამხარეო ადმინისტრაციის მიერ გავრცელებულ განცხადებაში.
ავტორი: კესო მოლაშხია
