ალერგოლოგ-იმუნოლოგი ბიძინა კულუმბეგოვი ვარაუდობს, რომ საქართველოს კორონავირუსის საწინააღმდეგო ვაქცინა 2021 წელს ექნება. ამის შესახებ კულუმბეგოვმა „პრაიმტაიმნიუსთან“ ინტერვიუში განაცხადა.
როგორ მან აღნიშნა, ამ ეტაპზე ყველაზე წარმატებული ამერიკული და ბრიტანული ვაქცინებია.
„წამალი ძალიან მაღალი ეფექტურობის მქონე არ გვაქვს. წამლის შექმნის დიდი პერსპექტივა, ჯერჯერობთ, არ ჩანს. ვაქცინები წარმატებით იცდება, მაგრამ ფინალური ეტაპები ჯერ შორს არის. შემოდგომაზე ვაქცინის მესამე ფაზის კვლევები, რომელის შემდეგაც უკვე მისი წარმოება იწყება, ალბათ, დასრულებული იქნება.
ამერიკული და ბრიტანული ვაქცინების პირველადმა შედეგებმა აჩვენა, რომ მათ შეუძლიათ იმუნური სისტემის ჩამოყალიბება კორონავირუსის მიმართ, ეს იმას ნიშნავს რომ ვაქცინები ეფექტურია. ახლა უნდა შემოწმდეს, რამდენად უსაფრთხოა ვაქცინები.
გუშინ ეს ინფორმაცია მასმედიაშიც გავრცელდა – ორ მწარმოებელთან აწარმოებენ მოლაპარაკებებს, თუ ვაქცინის შექმნა წარმატებით დასრულდა, ევროკავშირის ქვეყნებიც მოსახლეობას ამით აცრეს და ამერიკის შეერთებული შტატებიც, ვფიქრობ, 2021 წლის გაზაფხულისკენ ვაქცინა საქართველოში იქნება“,- განაცხადა კულუმბეგოვმა.
ინფორმაციისთვის, დღეს საქართველოში კორონავირუსის 24 ახალი შემთხვევა დაფიქსირდა. ჯამში ინფიცირებულთა რაოდენობამ 1073 შეადგინა.
ავტორი: ეკატერინე ზარნაძე
