როცა მე ვთქვი, რომ გავხდებოდი ქვეყნის პრემიერ-მინისტრი, ნამდვილად არ მიხუმრია. ზუსტად ვიცი რატომ მინდა ეს, – ამის შესახებ ახალი პოლიტიკური პლატფორმის „სტრატეგია აღმაშენებელის“ ლიდერმა გიორგი ვაშაძემ საგანგებო ბრიფინგზე განაცხადა.
ვაშაძე აცხადებს, რომ „სტრატეგია აღმაშენებელი“ არის ერთადერთი ძალა საქართველოში, რომელსაც ქვეყნის განვითარების კონკრეტული სტრატეგია აქვს გაწერილი.
„როცა მე ვთქვი, რომ გავხდებოდი ქვეყნის პრემიერ-მინისტრი, ნამდვილად არ მიხუმრია. ზუსტად ვიცი რატომ მინდა ეს. ეს არის ჩემთვის საშუალება დავამარცხოთ სიღარიბე და დავიწყოთ აღმშენებლობა. ეს არის ჩემთვის საშუალება, რომ არც ერთი მშიერი ადამიანი არ იყოს საქართველოში და არავის მოუწიოს ნაგავსაყრელზე საჭმლის ძებნა.
ამისთვის გვაქვს დეტალურად გაწერილი აღმშენებლობის სტრატეგია. ჩვენ ვართ ერთადერთი ძალა, რომელსაც აქვს კონკრეტული სტრატეგია როგორ უნდა მოხდეს ეს. არ არსებობს სხვა პოლიტიკური ძალა საქართველოში, შეიძლება რეგიონშიც კი, რომელსაც ასე დეტალურად ჰქონდეს ქვეყნის განვითარების სტრატეგია დაწერილი“, – განაცხადა ვაშაძემ.
