ბოლო ორ კვირაში ქვეყანა პირველ ადგილზეა 100 ათას მოსახლეზე ახალი შემთხვევების რიცხვით, რაც ძალიან ცუდია,- ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ „ფორმულას“ ეთერში განაცხადა.
„ჩემი თხოვნაა ყველასადმი, დავიცვათ რეკომენდაციები. მესმის, რომ არ არის მარტივი, მაგრამ ახლა აუცილებელია. ძალიან რთული დეკემბერი იქნება, რთული ახალი წელი მოდის ჩვენი ქვეყნისთვის და ზოგადად მთელი მსოფლიოსთვის.
ევროპაში ბოლო ორ კვირაში კოვიდით სიკვდილიანობამ გადაასწრო კიბოს, ინსულტს, მეორე ადგილზეა გულის იშემიური დაავადების შემდეგ.
30 დეკემბერს შესრულდება ერთი წელი კოვიდის გამოჩენიდან და მილიონ 400 ათასი გარდაცვლილია უკვე, გადაასწრო მალარიის, C და B ჰეპატიტის სიკვდილიანობის სტატისტიკას. სექტემბრის 10-მდე მივდიოდით კარგად და ახლა ვართ ისევ პირველ ადგილზე, ოღონდ სხვა მხრივ, 100 ათას მოსახლეზე ახალი შემთხვევების რიცხვით, რაც ძალიან ცუდია. პირდაპირ გეტყვით, ძალიან საგანგაშო რიცხვებია, რასაც ყველამ უნდა გავუწიოთ ანგარიში და ამ ორი თუ სამი კვირის განმავლობაში, 24 დეკემბრამდე გავუძლოთ ამ სირთულეებს, სხვა გამოსავალი არაა, ადამიანის ჯანმრთელობასა და სიცოცხლესთან გვაქვს საქმე. გთხოვთ, დავიცვათ რეკომენდაციები“, – განაცხადა ამირან გამყრელიძემ.
