ყარაბაღის საბოლოო სტატუსი დარეგულირებული არ არის, შევთანხმდით, რომ სტატუსკვოს ვინარჩუნებთ, – ამის შესახებ რუსეთის პრეზიდენტმა ვლადიმერ პუტინმა განაცხადა.
„დიახ, ასეთი პრობლემა არსებობს, ყარაბაღის საბოლოო სტატუსი დარეგულირებული არ არის. ჩვენ შევთანხმდით, რომ ვინარჩუნებთ სტატუსკვოს, დღეს არსებულ მდგომარეობას. რა იქნება შემდეგ – ეს მომავალში უნდა გადაწყდეს ან მომავალი ხელმძღვანელების ან ამ პროცესის მომავალი მონაწილეების მიერ. თუმცა, ჩემი აზრით, თუ შეიქმნება პირობები ნორმალური ცხოვრებისთვის, სომხეთსა და აზერბაჯანს შორის, ადამიანებს შორის ყოფით დონეზე ურთიერთობების აღდგენისთვის, განსაკუთრებით კონფლიქტის ზონაში, ეს შექმნის პირობებს ყარაბაღის სტატუსის განსაზღვრისთვისაც“, – განაცხადა რუსეთის პრეზიდენტმა.
ვლადიმირ პუტინი ყარაბაღის სტატუსზე საუბრისას საქართველოს ოკუპირებულ ტერიტორიებსაც შეეხო.
„რა შეეხება ყარაბაღის დამოუკიდებელ სახელმწიფოდ აღიარება-არ აღიარებას, ამის შეფასება სხვადასხვაგვარად არის შესაძლებელი, თუმცა ეს, ეჭვგარეშე, იყო არსებითი ფაქტორი, მათ შორის ახლახანს (იმედი მაქვს) დასრულებული სისხლისმღვრელი კონფლიქტის მიმდინარეობისას, რადგან ყარაბაღის არაღიარების თავად ფაქტი, მათ შორის სომხეთის მხრიდან, არსებითად აისახებოდა მოვლენების მიმდინარეობაზე და მათ აღქმაზე. აქ პირდაპირ უნდა ვთქვათ: თავის დროზე საქართველოს ყოფილი ხელმძღვანელობის უდავოდ დანაშაულებრივი ქმედებების შემდეგ, ვგულისხმობ სამხრეთ ოსეთში ჩვენს მშვიდობისმყოფელებზე დარტყმების განხორციელებას, რუსეთმა აღიარა სამხრეთ ოსეთისა და აფხაზეთის დამოუკიდებლობა. ჩვენ ვაღიარეთ სამართლიანად ყირიმში მცხოვრები ხალხის ნების გამოვლენა, იქ მცხოვრები ადამიანების სწრაფვა რუსეთთან შეერთებისკენ, ჩვენ მხარი დავუჭირეთ ამ ხალხს, ჩვენ ეს ღიად გავაკეთეთ. შეიძლება, ეს ვიღაცას მოსწონს, ვიღაცას არ მოსწონს, თუმცა ჩვენ გავაკეთეთ ეს იქ მცხოვრები ადამიანების ინტერესების, მთელი რუსეთის ინტერესების გათვალისწინებით და არ გვრცხვენია ამაზე ღიად საუბრის. ყარაბაღთან დაკავშირებით ეს არ გაკეთებულა და ამას, რა თქმა უნდა, არსებითად ჰქონდა გავლენა იქ მიმდინარე ყველა მოვლენაზე“, – განაცხადა ვლადიმერ პუტინმა.
