ფინანსთა მინისტრის მოადგილის, ნიკოლოზ გაგუას განცხადებით, სარეიტინგო სააგენტო S&P Global-ის პროგნოზით, 2021 წელს საქართველოს ეკონომიკა 4%-ით გაიზრდება და ეს იქნება ერთ-ერთი ყველაზე მაღალი მაჩვენებელი რეგიონში.
„მიუხედავად პერსპექტივის გაუარესებისა, რომელიც ძირითადად სააგენტოს ტურიზმის გლობალური პერსპექტივის შეფასებას უკავშირდება, ძალიან მნიშვნელოვანია ეს რეიტინგის შენარჩუნება. საქართველოს მთავრობის მთავარ მიზნად კვლავაც რჩება საინვესტიციო რეიტინგის მიღება, რასაც ჩვენ 2024 წელს ვგეგმავთ. მათი პროგნოზით, 2021 წელს საქართველოს ეკონომიკა 4%-ით გაიზრდება და ეს იქნება ერთ-ერთი ყველაზე მაღალი მაჩვენებელი რეგიონში“, – განაცხადა მინისტრის მოადგილემ.
სარეიტინგო სააგენტო S&P Global-მა საქართველოს სუვერენული საკრედიტო რეიტინგი „BB” დონეზე შეუნარჩუნა – პანდემიისა და გლობალური ეკონომიკური კრიზისის მიუხედავად, სარეიტინგო კომპანია Fitch-ის შემდეგ, ეს უკვე მეორე სარეიტინგო სააგენტოა, რომელმაც ქვეყნის სუვერენული საკრედიტო რეიტინგი უცვლელ, „BB” დონეზე დატოვა.
