„ქართული ოცნების“ თავმჯდომარის, ირაკლი კობახიძის განცხადებით, ექსპრეზიდენტის ჰოსპიტალში გადაყვანის რეალური საფუძველი არ არსებობდა და ეს ოპოზიციის სტრატეგიაა პოლიტიკური მიზნების განხორციელებისთვის.
„ამის პროგნოზირება იყო ძალიან მარტივი. ჩვენ თავიდანვე ვამბობდით, რომ რეალურად სააკაშვილის სამოქალაქო კლინიკაში გადაყვანის არანაირი საფუძველი არ არსებობდა. ეს იყო ერთგვარი საბაბი იმისთვის, რომ მეორე ეტაპზე, დაწყებულიყო საუბარი უკვე მის გათავისუფლებაზე.
ბუნებრივია, ეს არის ღიმილისმომგვრელი. მიხეილ სააკაშვილი არის მძიმე დანაშაულში მხილებული. მას აქვს შეფარდებული 6 წლით თავისუფლების აღკვეთა და რა თქმა უნდა, სამართლის უზენაესობისთვისა და პოლიტიკური პროცესების ნორმალიზებისთვის მნიშვნელოვანია მან სათანადოდ, კანონმდებლობის შესაბამისად მოიხადოს ეს სასჯელი“, – აცხადებს კობახიძე.
