ჩვენ გუშინ ფინანსთა მინისტრის გამოსვლა ვნახეთ, სადაც კარგად იყო ნაჩვენები, რომ სახელფასო ანაზღაურებით, ასევე მიმდინარე ხარჯების მოცულობით საქართველო არის ერთ-ერთი მოწინავე ამ ხარჯების სიმცირის მიხედვით, – ამის შესახებ დეპუტატმა, ბექა ლილუაშვილმა განაცხადა.
მისივე თქმით, ბიუჯეტში სახელფასო ფონდის ზრდა არა დეპუტატების ხელფასების ზრდისთვის, არამედ მხარდამჭერი საქმიანობის განმახორციელებელი პირებისთვისაა გათვალისწინებული.
„შეცვლილი რეგლამენტის შესაბამისად შეიცვალა საპარლამენტო საქმიანობის ჩარჩო. ვგულისხმობ იმას, რომ უნდა დაორგანიზდეს ფრაქციების მოწყობის წესი, რასაც დასჭირდება შესაბამისი შრომითი რესურსები. ამ თვალსაზრისით გვაქვს მცირედი ზრდა, თუმცა გვაქვს არაერთი შემცირება სხვადასხვა მიმართულებით ბიუჯეტში, მათ შორის კანონის დონეზე გვაქვს შეზღუდული სახელფასო ფონდები მუნიციპალიტეტების დონეზე, სადაც სახელფასო ფონდები წინა წლის იმავე მაჩვენებელთან შედარებით არ შეცვლილა. ზოგადად, რაც შეხება ამ საკითხის ჯამურად განხილვას, მიმდინარე ხარჯების და სახელფასო ხარჯების მიხედვით, ჩვენ გუშინ ფინანსთა მინისტრის გამოსვლა ვნახეთ, სადაც კარგად იყო ნაჩვენები, რომ სახელფასო ანაზღაურებით, ასევე მიმდინარე ხარჯების მოცულობით საქართველო არის ერთ-ერთი მოწინავე ამ ხარჯების სიმცირის მიხედვით. შესაბამისად, ამ საკითხებზე პედალირება, რომ ხელფასები იზრდება, არ მგონია, მართლებული იყოს. კიდევ არის ბიუჯეტში ხელფასების ნაწილში ცვლილება, დაახლოებით 60 მლნ-ის ჭრილშია, ოღონდ ეს არის ხელფასების ზრდა პოლიციელებისთვის, მასწავლებლებისთვის, ჯარისთვის და ყველა იმ ადამიანისთვის, ვინც პანდემიის პერიოდში მოწინავე ხაზზე იდგა და დგას დღემდე”,- განაცხადა ლილუაშვილმა.
