სენატის საგარეო კომიტეტის თავმჯდომარემ, ბატონმა რიშმა შეიტანა ახალი საკანონმდებლო ინიციატივა. ეს არის შესწორება იმ მნიშვნელოვან დოკუმენტში, რომელიც შეეხება 20-21 წელს საქართველოსთვის თავდაცვის სფეროში თანამშრომლობისთვის შესაბამისი ბიუჯეტის გამოყოფას. ამ დოკუმენტში საუბარია ვრცლად როგორც „გავრილოვის ღამეზე“, ასევე 8 მარტის შეთანხმებაზე, – ამის შესახებ „ნაციონალური მოძრაობის“ წევრი, სალომე სამადაშვილი აცხადებს.
მისი განმარტებით, აღნიშნულ დოკუმენტში საუბარია, რომ 8 მარტის შეთანხმებით გიორგი რურუა უნდა გათავისუფლდეს.
„დღეს აშშ-ის სენატში, სენატის საგარეო კომიტეტის თავმჯდომარემ, ბატონმა რიშმა შეიტანა ახალი საკანონმდებლო ინიციატივა. ეს არის შესწორება იმ მნიშვნელოვან დოკუმენტში, რომელიც შეეხება 20-21 წელს საქართველოსთვის თავდაცვის სფეროში თანამშრომლობისთვის შესაბამისი ბიუჯეტის გამოყოფას. დოკუმენტის სათაური არის დემოკრატიის ხარისხის შეფასება საქართველოში.
სწორედ, დემოკრატიული პრინციპების გატარებაზეა დამოკიდებული აშშ-ს სამხედრო თანამშრომლობა და ფინანსური დახმარება ჩვენი ფონდისთვის.
ამ დოკუმენტში საუბარია ვრცლად როგორც „გავრილოვის ღამეზე“, ასევე 8 მარტის შეთანხმებაზე. აღნიშნულია, რომ ამ შეთანხმების ნაწილია პოლიტპატიმარი გიორგი რურუას გათავისუფლება საპატიმროდან და შესაბამისად, ეს ადასტურებს, რომ არ არსებობს არანაირი ეჭვი, რომ 8 მარტის შეთანხმების პირობით, რურუა უნდა გათავისუფლდეს.
საკანონმდებლო ინიციატივა მიესალმება გიგი უგულავასა და ირაკლი კობახიძის გათავისუფლებას. და ამბობს: იმისთვის, რომ პოზიტიურად შეფასდეს ქვეყანაში დემოკრატიის პერსპექტივა, მნიშვნელოვანია 8 მარტის შეთანხმების ზუსტი შესრულება და 8 მარტის შეთანხმების ყველა პირობის დაცვა.
მე ვერ წარმომიდგენია უფრო ძლიერი პოლიტგზავნილი ჩვენი მძლავრი სტრატეგიული მოკავშირისგან.
ისინი გვეუბნებიან, დღეს 8 მარტის შეთანხმების ჩავარდნა პირდაპირ უქმნის საფრთხეს ჩვენს სტრატეგიულ ურთიერთობებს აშშ-სთან. ამიტომ მინდა ყველას ესმოდეს, ამ შეთანხმების შესრულება და გიორგი რურუას გათავისუფლება, რაც გზას გახსნის შეთანხმების სრულად შესრულებისკენ. ეს არ არის მხოლოდ ერთი პატიმრის და ერთი ოპოზიციური პარტიის საქმე.
მოვუწოდებ „ქართულ ოცნებას“ და ბიძინა ივანიშვილს, ან თქვენ შეასრულებთ 8 მარტის შეთანხმებას, გაათავისუფლებთ გიორგი რურუას და მოგვცემთ შესაძლებლობას, მხარი დავუჭიროთ საკონსტიტუციო ცვლილებებს, ან თქვენ ღიად და აშკარად აცხადებთ, რომ მათ შორის სამხედრო სამხედრო მიმართულებით თანამშრომლობა აშშ-სთან აღარ არის თქვენთვის პრიორიტეტი. მაშინ ქართველი ხალხისთვის ნათელი გახდება, რა არის ბიძინა ივანიშვილის საგარეო პოლიტიკური არჩევანი. ამ დოკუმენტით ყველაფერს პასუხი გაეცა, ახლა „ქართული ოცნებისგან“ შესაბამისი ნაბიჯების გადადგმას ველოდებით“, – განაცხადა სამადაშვილმა სპეციალურად გამართულ ბრიფინგზე.
