„გარედან იყო ინსპირირებული რაღაც ძალის მიერ ამ კონფლიქტის უფრო დიდი მასშტაბში გადაზრდის მცდელობა”, – ამის შესახებ მამა ანდრია ჯაღმაიძემ საპატრიარქოში გამართულ პრესკონფერენციაზე დმანისის ინციდენტზე საუბრისას განაცხადა.
მისი თქმით, საპატრიარქო მზადაა, მხარეებს შორის მოლაპარაკებების პროცესში ჩაერთოს, რათა მომავალში თავიდან იქნას აცილებული მსგავსი ინციდენტები.
„აზერბაიჯანულ მოსახლეობას, ჩვენს თანამოქალაქეებს, ვიცნობთ როგორც საქართველოს მოყვარულებს, მშრომელ, პატიოსან ადამიანებს და ჩვენი დამოკიდებულება მათდამი არის ანალოგიური. ყველას გვახსოვს, რომ მშვიდობა ჩვენს ერთ ოჯახში ყველასთვის მნიშვნელოვანია. ამიტომ ყოველი დაყოფა ეთნიკური ნიშნით არის ძალიან საშიში. ჩვენ ვნახეთ მცდელობა, სამწუხარო ყოფითი მოვლენის გადატანის მცდელობა იყო ფართო დაპირისპირებაში, რომელსაც შეიძლება მოჰყოლოდა დიდი უსიამოვნება. ღვთის წყალობით, ამდენი ხალხის ჩარევით, სახელწიფოს მეცადინეობით, მშვიდობიანად მოხდა ამ პრობლემის გადაწყვეტა.
სამწუხაროა, რომ ძალიან არასწორ კონტექტსში იყო ნახსენები სიტყვა ეკომიგრანტები, მოსახლეობის ნაწილის მიმართ ამან გამოიწვია მათი უკმაყოფილება. საღამოს ეთერშიც ტელევიზიები მხოლოდ ამ ტერმინს ხმარობდნენ, ეს იყო საკვირველი, როცა ამ ხალხის გაღიზიანებას იწვევდა, ასე გრძელდებოდა მათ ამ კონტექტსში მოხსენიება. საჭირო არის უფრო მეტი დაფიქრებულობა, რომ არ გავაღვივოთ კონფლიქტი, არამედ ხელი შევუწყოთ მშვიდობიან თანაცხოვრებას. ალბათ მედიასაც მართებს დაფიქრება, რა შეიძლებოდა უკეთესად გაკეთებულიყო, რათა ესკალაცია არ მომხდარიყო ვითარების. ჩვენ მზად ვართ, ნებისმიერ ფორმატში გავმართოთ საუბარი, შევაჯეროთ, დარწმუნებული ვართ, არავის ინტერესში არ შედის ეს კონფლიქტი, თუმცა უნდა ითქვას, რომ გამომდინარე იმ გარემოებებიდან, რაც ჩვენ ადგილზე ვიხილეთ, ცხადი გახდა, რომ გარედან იყო ინსპირირებული რაღაც ძალის მიერ ამ კონფლიქტის უფრო დიდი მასშტაბში გადაზრდის მცდელობა. სამწუხარო იქნება, თუ ჩვენ ვერ მოვახერხებთ ხოლმე, რომ დროულად აღვკვეთოთ მსგავსი ტენდენციები.“, – განაცხადა ჯაღმაიძემ.
ცნობისთვის, დმანისში ეთნიკურად ქართველი და აზერბაიჯანელი მოსახლეობა ერთმანეთს დაუპირისპირდა.
17 მაისს, გავრცელდა სათვალთვალო კამერის ჩანაწერებიც, სადაც სასურსათო მაღაზიასთან 2 ჯგუფის ჩხუბი ჩანს. კონფლიქტი ლუდის “ნისიად” ყიდვის თხოვნაზე მაღაზიისგან უარს მოჰყვა, რაც ჯგუფურ ჩხუბში გადაიზარდა.
ამასთან, როგორც ცნობილია, კონფლიქტი აღმოფხვრილია და მისი გაღვივების საშიშროება აღარ არსებობს.
