პრეზიდენტმა ემანუელ მაკრონმა, COVID-19-ის მეორე ტალღის გამო, საფრანგეთის რამდენიმე ქალაქში, მათ შორის პარიზში, ლილში, ლიონში, მარსელსა და ტულუზაში კომენდამტის საათის დაწესების შესახებ განაცხადა.

კომენდანტის საათი 21 საათიდან 06 საათამდე იმოქმედებს. ეს რეჟიმი 4 კვირის განმავლობაში გაგრძელდება.

„დიახ, რასაც კომენდანტის საათს ვუწოდებთ, წარმოადგენს ადეკვატურ ზომას“ – განმარტა მაკრონმა ფრანგულ ტელეარხებთან ინტერვიუში.

ფრანგი ლიდერი ხაზს უსვამს, რომ ეს რეჟიმი იმოქმედებს ილ-დე-ფრანსის რეგიონში, ასევე ლილში, გრენობლში, ლიონში, მარსელში, რუანში, სენტ-ეტენში, მონპელიესა და ტულუზაში.

მაკრონი ირწმუნება, რომ ხელისუფლება სიტუაციას ჯერ კიდევ აკონტროლებს.

„ჩვენ არ დაგვიკარგავს კონტროლი. ჩვენ ვართ სიტუაციაში, რომელიც გვაშფოთებს… მაგრამ ჩვენ ეპიდემიის პირველი ტალღიდან დასკვნები გამოვიტანეთ“ – განმარტა მაკრონმა.

„ფაქტობრივად, ვირუსი, რომელსაც უკვე 8 თვეა ვიცნობთ, ბრუნდება. ჩვენ ვართ სიტუაციაში, რომელსაც ხშირად მეორე ტალღას უწოდებენ“ – აცხადებს ფრანგი ლიდერი.