გაზრდის თუ არა კორონავირუსით ინფიცირებულთა რაოდენობას უცხო ქვეყნის მოქალაქეებისთვის 6 თვით საქართველოში მუშაობის ნებართვის გაცემა?!
როგორც ალერგოლოგ-იმუნოლოგმა ბიძინა კულუმბეგოვმა “პრაიმტაიმნიუსთან” განაცხადა, უცხო ქვეყნის მოქალაქეების საქართველოში ჩამოსვლა ინფიცირებულთა რიცხვის ზრდას არ გამოიწვევს. მისივე თქმით, საქართველო ყველა ქვეყანასთან საზღვარს ვეღარ ჩაკეტავს.
„უცხო ქვეყნის მოქალაქეების საქართველოში შემოსვლა ნაკლებად არის საფრთხის შემცველი. ტესტირება და უცხოელების შემოწმება უნდა გაძლიერდეს, სამუშაოდ თუ გრძელვადიანად, ჩვენს ქვეყანას განვითარება სჭირდება. ქვეყანა იზოლირებულ მდგომარეობაში ვეღარ იქნება, ამიტომ ჩვენ უცხოელებს მრავალჯერადად უნდა ჩავუტაროთ ტესტირება. ამ წესების დაცვით, უცხო ქვეყნის მოქალაქე ექვსი თვის განმავლობაში გაჩერდება საქართველოში.
ჩვენ ვართ სახელმწიფო, რომელიც გლობალური თანამეგობრობის წევრია, ამიტომ ჩვენ ხომ არ ჩავკეტავთ ყველასთვის საზღვარს, ეს ყოველგვარ საღ აზრს სცდება. ვერავითარ საშიშროებას ვერ ვხედავ უცხოელების საქართველოში შემოსვლაში“,- განაცხადა კულუმბეგოვმა.
ინფორმაციისთვის, რამდენიმე დღის წინ ტურიზმის ეროვნული ადმინისტრაციის ხელმძღვანელმა მარიამ ქვრივიშვილმა განაცხადა, რომ „საქართველო უცხო ქვეყნის მოქალაქეებს ნებას დართავს, საქართველოში 6 თვის ვადით შემოვიდნენ და დისტანციური სამუშაო პროცესები ქვეყნიდან განახორციელონ“.
ავტორი: ეკატერინე ზარნაძე
