გუშინ, სალომე ზურაბიშვილისა და სომხეთის პრეზიდენტის არმენ სარქსიანს შორის შეხვედრა შედგა.
შეხვედრის მთავარი თემა, როგორც მოსალოდნელი იყო, რეგიონული უსაფრთხოება და მთიანი ყარაბაღის შემდეგ კავკასიაში შეცვლილი არქიტექტურა იყო.
საქართველოს პრეზიდენტი ადასტურებს, რომ საქართველო მშვიდობის მხარესაა და კვლავ სთავაზობს სომხეთს საკითხზე დისკუსიების სივრცეს, არმენ სარქსიანს ინიციატივისთვის საჯაროდ არ უპასუხია.
„მე ბატონ სარქისიანს გავაცანი ჩვენი საქართველოს ოკუპირებულ ტერიტორიებზე არსებული ვითარება. უკანონო ბორდერიზაცია, ნებისმიერი კონფლიქტი რეგიონს აზარალებს, ამიტომ მშვიდობა და თანამშრომლობა უალტერნატივოა კავკასიის განვითარებისთვის. კონფლიქტის დროს როგორც ახლა, საქართველო მშვიდობის მხარეს იდგა და დგას. ამის ნიშნად შეთავაზებულ იქნა ჩვენი პლატფორმა შეხვედრებისთვის, დიალოგისთვის და სიტუაციის განმუხტვისთვის ეს შეთავაზება ძალაში რჩება ნებისმიერ დროს,” – განაცხადა საქართველოს პრეზიდენტმა სალომე ზურაბიშვილმა.
სომხეთის პრეზიდენტი ტრადიციულად კრიტიკული იყო აზერბაიჯანული და თურქული მხარის მისამართით.
“შეუძლებელია რეგიონში ხანგრძლივი მშვიდობის დამყარება და სტაბილურობის შენარჩუნება არცახის საკითხის მოგვარების გარეშე, მათ შორის ეუთოს მინსკის ჯგუფის თანათავმჯდომარეობის ფარგლებში კონფლიქტის მოგვარების პროცესის აღდგენის გზით. ხაზი გავუსვით ომის შედეგად უზარმაზარი ჰუმანიტარული პრობლემების გადაწყვეტის აუცილებლობას. მათ შორის ვისაუბრე აზერბაიჯანის მხრიდან დატყვევებული მძევლების სწრაფი გათავისუფლების საკითხზე,” – განაცხადა სომხეთის პრეზიდენტმა არმენ სარქისიანმა.
