იმედი გვაქვს, რომ გამოძიება ბოლომდე მივა და არ იქნება ისე, როგორც ბევრ სხვა შემთხვევაში და საზოგადოებას ეცოდინება, ობიექტური ინფორმაცია, თუ რა მოხდა, – ამის შესახებ „ევროპული საქართველოს“ წევრი, სერგო რატიანი ჟურნალისტ გიორგი გაბუნიას შესაძლო ლიკვიდაციაზე აცხადებს.
„ამის ფონზე ვხედავთ, რომ ჩვენი საზღვრები დაუცველია. ფაქტობრივად, საქართველოში გადაადგილდებიან ადამიანები, რუსეთის ჯაშუშები და მათ არანაირი პრობლემა არ აქვთ.
„ქართული ოცნების“ ხელისუფლებაში ყოფნის ბოლო პერიოდში ჩვენ არ გვახსოვს არცერთი შემთხვევა, რომ ჯაშუშობა გამოევლინოთ. თუმცა, გვახსოვს შემთხვევები, როდესაც რეალურად ჯაშუშები იყვნენ გადაცემულები, როგორც პოლიტპატიმრები. ეს ძალიან მძიმე სურათია. ვხედავთ, რომ ტერორისტები საზღვარს უპრობლემოდ გადმოლახავენ და ეს არის ის შემთხვევა, როდესაც შეგვიძლია ვთქვათ, რომ საქართველოს მოქალაქეები არ არიან დაცულები.
მაშინ გაბუნიას განცხადებების შემდეგ რაც იყო, ეს სამარცხვინო და სრულიად შეუფერებელია ჩვენი სახელმწიფოსთვის.
გვახსოვს, პრორუსულმა ძალებმა მოაწყვეს ობსტრუქცია და დაიკავეს რუსთაველი. ეს იყო ხელისუფლების მხრიდან წახალისებული. ამ შემთხვევაში იმედი გვაქვს, რომ გამოძიება ბოლომდე მივა“, – აცხადებს რატიანი.
შეგახსენებთ, ჩეჩნეთის ლიდერმა რამზან კადიროვმა “ეხო მასკვიზე” 1 წლის წინ, ქართველი ჟურნალისტის, გიორგი გაბუნიას მიმართ მუქარის წერილი გამოაქვეყნა.
მანამდე, გაბუნიამ „პოსტ სკრიპტუმის” პირდაპირ ეთერში რუსეთის პრეზიდენტს, ვლადიმერ პუტინს, რუსულად აგინა. გიორგი გაბუნიას მონოლოგმა საზოგადოების ნაწილის აღშფოთება გამოიწვია.
ტელეკომპანია “რუსთავი 2”-მა მომხდარის გამო მაყურებელს მაშინ ბოდიში მოუხადა. გიორგი გაბუნიას კი უფლებამოსილება 2 თვით შეუჩერდა.
