„თუ ისე მოვიქცევით, როგორც ვიქცეოდით მარტში, აპრილში, მაისში, როდესაც იყო სერიოზული დამყოლობა, მაშინ დიდი იმედია, რომ ეპიდსიტუაცია არ გაგვიუარესდება“, – ამის შესახებ საქართველოს „პირველ არხს“ დაავადებათა კონტროლის ეროვნული ცენტრის დირექტორმა, ამირან გამყრელიძემ განუცხადა.
„საქართველოში ეპიდსიტუაცია სრულად კონტროლირებადია. დღევანდელი მონაცემებით არის 951 დადასტურებული შემთხვევა. საქართველოში კორონავირუსის გავრცელების მაჩვენებელი ერთ-ერთი ყველაზე დაბალია ევროპაში. სასურველია და აუცილებელია, ეპიდსიტუაციის ასეთი მდუნე მიმდინარეობა შევინარჩუნოთ ქვეყანაში.
ამიტომ მოსახლეობამ უნდა გაითვალისწინოს ყველა ის რეკომენდაცია, რასაც ჯანდაცვის სფერო იძლევა. მხედველობაში მაქვს დისტანცირება, პირბადის ტარება იმ ადგილებში, სადაც აუცილებელია, ხელების ხშირი დაბანა, თავის არიდება დიდი თავშეყრების, ქორწილების, დიდი დაბადების დღეებისა და ა.შ.
თუ ისე მოვიქცევით, როგორც ვიქცეოდით მარტში, აპრილში, მაისში, როდესაც იყო სერიოზული დამყოლობა, მაშინ დიდი იმედია, რომ ეპიდსიტუაცია არ გაგვიუარესდება. ქვეყანაში 24 საათში კორონავირუსის ხუთი ახალი შემთხვევა გვაქვს. აქედან ოთხი გახლავთ იმპორტირებული, აქედან სამი გახლავთ სატვირთო ავტომობილის მძღოლი, ერთი არის ადგილობრივი სამედიცინო მუშაკი და ერთი ასევე შემოტანილი სარფის საზღვრიდან“,- განაცხადა ამირან გამყრელიძემ.
