ძალიან ბევრი შეხვედრა ჩავატარეთ ბოლო პერიოდში და ყოველი შეხვედრისას ვრწმუნდები, რომ საზოგადოების ძალიან დიდი ნაწილი გაცილებით უფრო გაიზრდა პოლიტიკურად და ემოციურად, ვიდრე ზოგიერთი პოლიტიკური პარტია და პოლიტიკური სუბიექტი, – ამის შესახებ პარტია „ქართული ოცნება-დემოკრატიული საქართველოს“ დიდუბე-ჩუღურეთის მაჟორიტარი დეპუტატობის კანდიდატმა გიორგი ვოლსკიმ მხარდამჭერებთან შეხვედრისას განაცხადა.
სიტყვით გამოსვლისას გია ვოსლკიმ ისაუბრა იმ პოლიტიკოსებზე, რომლებიც მისი თქმით, ქვეყნის უსაფრთხოების, მომავალი თაობისა და ბავშვების წინაშე უპასუხისმგებლოები არიან.
„ძალიან კარგად გრძნობენ, რომ სადისტური მმართველობა, რომელიც არსებობდა, არსად წასულა, ელოდება თავის ჯერს, ჩასაფრებულია და ვითომ ფარისევლური ნაბიჯებით უნდა თავი დააღწიოს მათზე შექმნილ საკმაოდ ობიექტურ შეხედულებას. არიან პოლიტიკური თაღლითები, რომლებიც პირდაპირ ტყუილზე არიან გადასულები. არიან ადამიანები, რომლებიც ცდილობენ შექმნან ქაოსური სიტუაცია და იქნებ ამ ამღვრეულ წყალში მიიღონ პოლიტიკური დივიდენდი. ხალხმა კარგად იცის, სად არის სიმართლე და ზუსტად იციან, რა არის ქვეყნის წინაშე მდგარი პრობლემები“, – აცხადებს გია ვოლსკი.
მისივე შეფასებით, არა მხოლოდ მათი პოლიტიკური გუნდი, არამედ საზოგადოების დიდი ნაწილია მობილიზებული, რათა არ დაუშვას ის, რასაც მათი ოპონენტების გარკვეულ ნაწილს აქვთ განზრახული.
„საზოგადოებას კარგად აქვს გაცნობიერებული, რას გვიქადის მომავალი, თუ კი ჩვენ გზას დავუთმობთ დესტრუქციულ ძალას. არა ჩვენ, კონკრეტული პოლიტიკური გუნდი, არამედ საზოგადოების უშველებელი ნაწილი არის მობილიზებული, რათა არ დაუშვას ის, რასაც გვიქადის ჩვენი ოპონენტების გარკვეული ნაწილი, – ამბობს ვოლსკი.
ცნობისათვის, პარტია „ქართული ოცნება-დემოკრატიული საქართველო“ მხარდამჭერებთან შეხვედრას მუშთაიდის ბაღში მართავს, სადაც დიდუბე-ჩუღურეთის მაჟორიტარ დეპუტატად გია ვოლსკი წარადგინეს.
