საქართველოს ეროვნული ბანკის მიერ ინიცირებული პროგრამა, რომელიც კომპანიების კაპიტალურ ბაზრებზე წვდომის გაუმჯობესებას ისახავს მიზნად, ევროკავშირის და ევროპის რეკონსტრუქციისა და განვითარების ბანკის კაპიტალის ბაზრების განვითარების გუნდი მხარს უჭერს. აღნიშნულის შესახებ ინფორმაციას სებ-ი ავრცელებს.
წყაროს მიხედვით, განსაზღვრული კრიტერიუმებით შერჩეულ კომპანიებს, პროგრამის ფარგლებში შეთავაზებული ტექნიკური მხარდაჭერა, ფასიანი ქაღალდების ბაზრის საშუალებით დაფინანსების მოპოვებასა და ადგილობრივ თუ საერთაშორისო ინვესტიციების მობილიზებაში დაეხმარება.
“პროგრამა ითვალისწინებს ინდივიდუალური კომპანიებისთვის საჭიროებაზე მორგებულ საკონსულტაციო სერვისების/მომსახურებების მიწოდებას ან/და ფინანსურ მხარდაჭერას, ისეთ საკითხებში, როგორიცაა საკრედიტო რეიტინგის მოპოვება, კორპორაციული მმართველობის და გამჭვირვალობის გაუმჯობესება, საჯარო ემისიის პროსპექტის მომზადება და სხვა” – წერია განცხადებაში.
