დილიდან უკვე ჩანს საკმაოდ სერიოზული დარღვევები,- ამის შესახებ „ევროპული საქართველოს“ საარჩევნო შტაბის ხელმძღვანელმა, სერგი კაპანაძემ განაცხადა.
„რაც უფრო მეტი ადამიანი მივა, მით უფრო ნაკლები შანსი ექნება ბიძინა ივანიშვილს, რომ ხელისუფლება შეინარჩუნოს, გარანტირებული იქნება მისი ოპოზიციაში გადასვლა. თუმცა, დილიდან უკვე ჩანს საკმაოდ სერიოზული დარღვევები.
ორი მასშტაბური პრობლემა გამოიკვეთა, პირველი ესაა ხმის ფარულობის დარღვევა, გვაქვს რამდენიმე შემთხვევა, როდესაც „ქართული ოცნების“ კომისიის წევრები, დამკვირვებლები დგანან უბნებზე ურნებთან, რომ დაინახონ როგორაა შემოხაზული ესა თუ ის ბიულეტენი და ჩვენი წარმომადგენლები ასეთ შემთხვევებზე საჩივრებს წერენ.
„ქართულ ოცნებას“ მოვუწოდებთ, რომ ასეთი პრაქტიკა აღკვეთოს, წინააღმდეგ შემთხვევაში არჩევნების ლეგიტიმურობას სერიოზული პრობლემა ექმნება და მეორე, ძალიან სერიოზული პრობლემა დაფიქსირდა რამდენიმე უბანზე, ესაა, ვაკის 54-ე და გურჯაანის 31-ე უბნები, სადაც ვხედავთ პრაქტიკას, რომ „ქართული ოცნების“ კომისიის წევრები, როდესაც ბიულეტენს ამომრჩეველს აძლევენ, ისე ახევენ, რომ მასზე ორი ნომერი მოხეულია, ანუ ამომრჩეველს ბიულეტენს ორი ნომრის გარეშე აძლევენ. ამის შესახებ ინფორმაცია შემოგვდის“,- განაცხადა კაპანაძემ.
დღეს, 31 ოქტომბერს საქართველოში საპარლამენტო არჩევნები მიმდინარეობს. ამომრჩეველთა ერთიან სიაში სულ 3 205 634 ამომრჩეველია რეგისტრირებული. ქვეყნის მასშტაბით გახსნილია 3 657 საარჩევნო უბანი. იმ ამომრჩევლებისთვის, რომლებიც იმყოფებიან სამკურნალო დაწესებულებებში, კარანტინსა და თვითიზოლაციაში, ცალკე დამატებით შეიქმნა 127 სპეციალური საარჩევნო უბანი.
არჩევნებში 48 პოლიტიკური პარტია და ორი საარჩევნო ბლოკი მონაწილეობს.
