ევროკავშირის საბჭოს პრეზიდენტი შარლ მიშელი საქართველოს პირველ მარტს ეწვევა. ამის შესახებ საქართველოს პრეზიდენტმა სალომე ზურაბიშვილმა გადაცემაში „რა დროს ძილია“ განაცხადა.
მისი თქმით, თარიღი უკვე დადასტურებულია და ლოგიკურია, რომ სავარაუდოდ ევროპელი სტუმარი სომხეთს და აზერბაიჯანსაც ეწვიოს. პრეზიდენტმა ინტერვიუს დროს ბრიუსელში ვიზიტის შედეგები შეაჯამა.
„თუ ჩვენ ვართ ისეთი დაფასებული, ისე ახლოს, როგორც მეუბნებიან; აღირებულია ჩვენი რეფორმები და ვართ ყველაზე ახლო ასოცირებული ქვეყანა, ჩვენც უნდა ვიგრძნოთ სოლიდარობა იმ დროს, როდესაც კრიზისია. მეორე – იყო ჩემი საკმაოდ კრიტიკული შეფასება ევროკავშირის საგარეო პოლიტიკის, რადგან პირდაპირ ასე დავაყენე საკითხი – თუ ევროკავშირს აქვს პრეტენზია, რომ ჰქონდეს საგარეო პოლიტიკა, არ შეიძლება, რომ უფრო აქტიურად არ იყოს ჩართული ყველა იმ კონფლიქტში, რომელიც მის სამეზობლოშია, ძირითადად დაკავშირებული რუსეთთან, ეს არის უკრაინა, ახლანდელი კონფლიქტი რეგიონში და ჩვენი ოკუპირებული ტერიტორიები.
ის რომ, ვეუბნებით, საქართველო უნდა ახსენოთ ყველა შეხვედრაზე რუსეთთან, რა ფორმატიც არ უნდა იყოს, არ შეიძლება მივიწყებული იყოს საქართველო და ოკუპირებული ტერიტორიები. ისიც დავაყოლე, რომ ბოლო კონფლიქტი, რომელიც მეზობელ ქვეყნებს შორის მოხდა, ევროპამ მეტი აქტიურობა უნდა გამოიჩინოს და დაიცვას თავისი ინტერესები“, – განაცხადა პრეზიდენტმა.
გადაცემის წამყვანის კითხვაზე რა შედეგი და პასუხი მოჰყვა პრეზიდენტის ამ განცხადებებს, სალომე ზურაბიშვილმა განაცხადა, რომ საქართველოში შარლ მიშელი ჩამოდის, თარიღი უკვე დადასტურებულია და ლოგიკურია, რომ სავარაუდოდ ევროპელი სტუმარი სომხეთს და აზერბაიჯანსაც ეწვიოს.
„პასუხი იყო, რომ ვიცით, უფრო მეტად აქტიურები და ჩართულები უნდა ვიყოთ და ამის მოლოდინიც არის შიდა წრეებში“, – აღნიშნა პრეზიდენტმა.
