ხმაური იყო აჭარის მთავრობის სახლთან, სადაც მრავალშვილიანი, სოციალურად დაუცველი ოჯახი მთავრობის თავმჯდომარე თორნიკე რიჟვაძესთან შეხვედრას ითხოვს.

როგორც სოფელ ხერთვისის მკვიდრი ნანული სურმანიძე აცხადებს, რამდენიმე წლის წინ განვითარებული მეწყერული პროცესების შედეგად მისი საცხოვრებელი სახლი დაზიანდა და ამჟამად მეუღლესა და ოთხ არასრულწლოვან შვილთან ერთად ავარიულ სახლში ცხოვრობს.

„რამდენჯერმე განვითარდა მეწყერული პროცესი ჩემს საცხოვრებელ სახლთან ალბათ სამ-ოთხჯერ.

რვა წელია ვითხოვ დახმარებას. მრავალშვილიანი დედა ვარ, ოთხი შვილი მყავს. მოვალ, დამპირდებიან, შედეგი არანაირი. ზამთარი მოდის და ერთი ოთახიც არ მაქვს, იმ ავარიულ სახლში ვცხოვრობ. ხომ უნდა მომაქციონ ყურადღება. მაქვს გეოლოგიური დასკვნა. ან უნდა შეეკეთებინათ აქამდე, ან როგორმე დავეკმაყოფილებინე.

ძალიან მძიმე მდგომარეობაში ვართ. ორი სკოლის მოსწავლე მყავს, ერთი მეთერთმეტეკლასელია, კარგი მოსწავლეები არიან და ონლაინსწავლებაში ვერ ერთვებიან, გამოცდები როგორ უნდა ჩააბარონ.

ძალიან ბევრი პრობლემა გვაქვს, მაგრამ ყველაზე მეტად ავარიულ სახლში ცხოვრება გვაშინებს. არავინ არ გვაქცევს ყურადღებას. ყველას მივმართე დახმარებისთვის, აჭარის მთავრობასაც და ხელვაჩაურის მერიასაც. მერამდენეჯერ მოვედი მთავრობის სახლთან, არ ვიცი.

არ გვხვდება თორნიკე რიჟვაძე. არც ხელვაჩაურის მერიაში არ გვაქცევენ ყურადღებას.

ფაქტობრივად, სახლი არ მაქვს, დაინგრევა სადაცაა. როგორც ჯოჭოში მოხდა, იგივე ჩემ შვილებს რომ არ დაემართოს, მე ყველაფერს გავაკეთებ. დედა ვარ და ჩემს ოთხ შვილს ვიცავ. მე დავიღუპო, არ ვდარდობ, მაგრამ ჩემ შვილებს დავიცავ. ჩემი შვილები გაჭირვებით მყავს გაზრდილი. არავინ არ დამხმარებია.

300 ლარი მაქვს დახმარება. პურის, შაქრისა და ზეთის გარდა ვერაფერს ვყიდულობ ამ თანხით. ჩაისა და პურზე მყავს შვილები. სახლი როგორ უნდა ავაშენო?

მოქალაქე როგორ არ უნდა მიიღოს მთავრობის თავმჯდომარემ. პოლიციას ვთხოვ და არ მიშვებენ. როგორ შეიძლება შენი მოქალაქის ასეთი დამცირება და უგულებელყოფა.

სანამ არ შემხვდება მთავრობის თავმჯდომარე, აქედან ფეხს არ მოვიცლი. სხვა გზა არ მაქვს, ჩემი შვილების სიცოცხლე საფრთხეშია“ – აცხადებს ნანული სურმანიძე.

ავტორი: ნაირა ქობულაძე