ტალინის ბნელი ღამეების 24-ე კინოფესტივალი გაიხსნა. ფესტივალის წლევანდელი გამოშვება მაყურებელს  4 სრულმეტრაჟიან ქართულ მხატვრულ ფილმს წარუდგენს.

ზაზა ურუშაძის პატივსაცემად, ტალინში აჩვენებენ რეჟისორის 3 ფილმს: „მანდარინები”, „სამი სახლი” და „ანტონი”.

„ანტონი” ზაზა ურუშაძის ბოლო ნამუშევარია. იგი 2 ბიჭის მეგობრობის ისტორიის შესახებ მოგვითხრობს. ფილმი უკრაინის, საქართველოს, ლიეტუვის, შეერთებული შტატებისა და კანადის კოპროდუქციაა.

სექციაში CURRENT WAVES აჩვენებენ დეა კულუმბეგაშვილის სადებიუტო სრულმეტრაჟიან ფილმს „დასაწყისი”. ეს სექცია აერთიანებს იმ ფილმებს, რომელთა მსოფლიო პრემიერაც უკვე წარმატებით გაიმართა სხვადასხვა წამყვან კინოფესტივალზე.

„დასაწყისი” საქართველოს კანდიდატი ფილმია ამერიკის კინოაკადემიის 2021 წლის საერთაშორისო სრულმეტრაჟიანი ფილმის ნომინაციისთვის. იგი საქართველოსა და საფრანგეთის კოპროდუქციაა.

ტალინის საერთაშორისო კინოფესტივალი ერთ-ერთი უმნიშვნელოვანესი კინომოვლენაა ჩრდილოეთ ევროპაში, რომელიც ა-კლასის ფესტივალების კატეგორიას მიეკუთვნება.

ინფორმაციას ეროვნული კინოცენტრი ავრცელებს.