ჭიათურაში უცნობმა პირებმა პენსიონერი ცოლ-ქმარი დააყაჩაღეს. შემთხვევა გუშინ, ჭიათურის მუნიციპალიტეტის სოფელ ხალიფაურში 23:00 საათისთვის მოხდა.
გავრცელებული ინფორმაციით, ხუთმა შეიარაღებულმა პირმა მასხარაშვილების ოჯახი დააყაჩაღა. ასევე ვრცელდება ინფორმაცია, რომ თავდამსხმელებს პენსიონერი ცოლ-ქმარი საათნახევრის განმავლობაში გაკოჭილი ჰყავდათ.
დაზარალებული ოჯახი ყვება, რომ ყაჩაღებმა 3 ათას ლარამდე თანხა და ძვირადღირებული ნივთები წაიღეს. ასევე, კვალის დაფარვის მიზნით მათ შემთხვევის ადგილზე ალკოჰოლი დაასხეს.
„დაგვადგნენ თავზე და არ გაინძრეთო, არაფერს არ დაგიშავებთო. ოღონდ არ იხმაუროთო და ფული და ოქრო მოგვეცითო. მე თვითონ ვასწავლე სად მქონდა ფულიც და ოქროც და აიღეს. ერთი დაგვადგა იარაღიანი, დანარჩენებმა შუქები გამორთეს, კარები მიკეტეს და ყველაფერი თავდაყირა დააყენეს, – ამბობს ნათელა მასხარაშვილი.
შსს-ს ინფორმაციით, მომხდარზე გამოძიება სისხლის სამართლის კოდექსის 179-ე მუხლით დაიწყო, რაც ყაჩაღობას გულისხმობს. მათივე ცნობით, თავდამსხმელების იდენტიფიცირების მიზნით ამ დრომდე ინტენსიური საგამოძიებო მოქმედებები მიმდინარეობს.
